लगानी सम्मेलन लक्षित अध्यादेशबारे राष्ट्रपतिसँग प्रधानमन्त्रीको छलफल

५ वैशाख, काठमाडौँ । राष्ट्रपति रामचन्द्र पौडेलसँग प्रधानमन्त्री पुष्पकमल दाहाल प्रचण्डले बुधबार भेटवार्ता गरेका छन् । अपराह्न राष्ट्रपति भवन शीतल निवासमा राष्ट्रपति पौडेल र प्रधानमन्त्री प्रचण्डबीच आसन्न लगानी सम्मेलनका विषयमा छलफल भएको छ । सरकारले लगानी सम्मेलनलाई लक्षित गरेर विभिन्न अध्यादेश ल्याउने तयारी गरेको छ ।

लगानी सम्मेलनमा धेरैवटा ऐनहरु परिमार्जन, थपघट र खारेज गर्नु पर्ने भनेर सरकारलाई सुझाव आएको छ । संसदबाट तत्काल यसबारे निर्णय गर्न नसकिने भएकाले लगानी प्रबर्दन सम्बन्धी केहि कानुन बनाउन सरकारले अध्यादेश ल्याउन खोजेको छ । भेटवार्तामा देशको अन्य समसामयिक विषयमा पनि छलफल भएको राष्ट्रपतिको स्वकीय सचिवालयले जनाएको छ ।