बेहुला सहित ५५ जना जन्ति बोकेको बस दुर्घटना हुँदा मृत्युहुने तीन जनाकै सनाखत

७ वैशाख, काठमाडौं । सिन्धुपाल्चोकमा जन्ती बस दुर्घटनामा ज्यान गुमाउने तीनै जनाको सनाखत भएको छ । शुक्रबार बिहान साढे ७ बजे भएको बा ४ ख  ५६१६ नम्बरको बस दुर्घटना भएको थियो । जिल्ला प्रहरी कार्यालय सिन्धुपाल्चोकका डिएसपी निरञ्जन भट्टराईका अनुसार मृतक तीनै जना दोलखा भीमेश्वर नगरपालिका वडा नम्बर १ का छन् ।

मृत्यु हुनेमा भीमेश्वर नगरपालिका–१ दोलखाका अन्दाजी ७० वर्षीय मान बहादुर थामी, सोही वडाका अन्दाजी वर्ष १६ का शिव श्रेष्ठ र भीनपा–१ कै अन्दाजी १७ वर्षीय दिपेन्द्र थामीको घटनास्थलमा मृत्यु भएको भीमेश्वर नगरपालिकाका मेयर ईश्वर नारायण मानन्धरले जानकारी दिए ।

उनका अनुसार घाइते ५२ जनामध्ये सामान्य घाइते २३ जनाको स्थानीय स्वास्थ्य संस्थामा सामान्य उपचार भइरहेको छ भने बाँकी २९ जनाको खाडिचौरस्थित सिन्धु सदाबहार अस्पतालमा उपचार भइरहेको छ । सिन्धु सदाबहार अस्पतालका अनुसार गम्भीर घाइते भएका बिरामीहरुको पहिचान भइरहेको र उनीहरुलाई काठमाडौं पठाइने तयारी भइरहेको छ ।

५२ जना बोकेको बसभीमेश्वर–१ सुस्पाबाट सिन्धुपाल्चोक त्रिपुरासुन्दरी–४ पिस्करमा दुलही लिन हिँडेको थियो ।