अमिर शेखको भ्रमणलाई लिएर सुरक्षामा कडाई

१० वैशाख, काठमाडौं । सरकारले कतारका अमिर शेख तमिम बिन हमाद अल थानीको नेपाल भ्रमणलाई लिएर आज साँझबाट नै विशेष सुरक्षा निगरानी बढाउने भएको छ । उच्च सुरक्षा स्रोतले दिएको जानकारी अनुसार उनको भ्रमणलाई व्यवस्थित र सुरक्षित बनाउन सुरक्षाकर्मीले सोमबार साँझदेखि काठमाडौं उपत्यकाका विभिन्न ठाउँमा चेकजाँच कडा बनाउने भएको छ । उपत्यकाका नाकामा पनि चेकजाँच गरिनेछ ।  

अमिर शेख भोलि मंगलबार साँझ ५ बजे त्रिभुवन विमानस्थमा आइपूग्ने कार्यक्रम छ । उनी विमानस्थलबाट सिधै होटल शोल्टी जाने कार्यक्रम छ । उनको सुरक्षा नेपाली सेनाले गर्नेछ ।  भोलि मंगलबार ११ गतेदेखि नेपालको दुई दिने राजकीय भ्रमण गर्ने कतारका अमिर शेखको मध्यपूर्व एसियाबाट पहिलोपटक हुन लागेको यो उच्चस्तरको भ्रमण हो । उनको यो भ्रमणमा नेपालले आफ्ना श्रमिकका हकहितमा उपयोग गर्नुपर्ने यस क्षेत्रका जानकारको सुझाव छ । 

कतारमा हाल झण्डै चार लाख नेपाली कामदार विभिन्न क्षेत्रमा कार्यरत छन् । भ्रमणमा नेपाल सरकारले नेपाली श्रमिकको पारिश्रमिक, रोजगारको सुरक्षा, हकहितका विषयमा पहल गर्नेछ । कतारबाट हुन लागेको यो उच्चस्तरको भ्रमण हो । दुईदिने भ्रमणका अवसरमा कतारी अमिरले राष्ट्रपति पौडेलसँग शीतलनिवासमा भेटवार्ता गर्ने परराष्ट्र मन्त्रालयले जानएको छ । 

राष्ट्रपति पौडेलले उनको सम्मानमा राजकीय भोजको आयोजना गर्नेछन् ।  त्यस्तै कतारका अमिरले वैशाख १२ गते प्रधानमन्त्री पुष्पकमल दाहाल प्रचण्डसँग द्विपक्षीय वार्ता गर्नेछन् । वार्तापछि दुवै नेताहरू द्विपक्षीय सम्झौता र समझदारीपत्रमा हस्ताक्षर गर्ने समारोहमा उपस्थित हुने कार्यक्रम छ । कतारका अमिर थानी वैशाख १२ गते नै काठमाडौँबाट प्रस्थान गर्ने तालिका छ ।