लुम्बिनी विकास कोषले देखायो हदैसम्मको लापरवाही, अहिलेसम्म फेरिएन च्यातिएको झण्डा

१२ वैशाख, लुम्बिनी । लुम्बिनी विदेशी पर्यटकहरूको आकर्षको केन्द्र हो । यहाँ विभिन्न देशबाट भ्रमणका लागि पर्यटकहरू आइपुग्छन् । विदेशी मात्र हैन, स्वदेशीका लागि पनि घुम्नका लागि लुम्बिनी आकर्षक ठाउँ हो । तर, पर्यटकको आकर्षणका लागि राखिएको नेपाली झण्डाको अवस्थाले भने नेपाल र नेपालीकै बेइज्जत गराएको छ ।  

लुम्बिनी विकास कोषको यो हदसम्मको लापरबाहीले गर्दा विश्वमा नेपालको शिर निहुरिएको छ । यहाँ आएर फर्किएका हरेका पर्यटकले आफ्नो देशमा पुगेपछि नेपालको झण्डाबारे बे बयान गर्लान् यो कुनै पनि सरकारी पक्षले सोचेको छैन । लामो समयदेखि नेपालको झण्डा च्यातिएर फरफराइ रहेको छ । यो दृष्य सबैले देखिरहेका छन् ।  

लुम्बिनी विकास परिषदको  केन्द्रीय नहर स्थित मण्डलमा राखिएको नेपालको झण्डा च्यातिएको अहिले हैन । लामो समय भइसकेको छ । यहाँ थरिथरिका पर्यटनमन्त्रीहरु आइपुगे तर, यो झण्डाको अवस्था फेरिएको छैन । पर्यटकलाई लक्षित गरि यस क्षेत्रकै ठूलो झण्डाको रुपमा बनाइए पनि लुम्बिनी विकास कोषले लामो समयदेखि न त च्यातिएको झण्डा फेर्न सकेको छ, न त झण्डा राखिएको पाइप पेन्ट नै गर्न सकेको छ । 

पर्यटकीय केन्द्रको रुपमा यहाँ लुम्बिनी आउने पर्यटकले सेल्फी र फोटो खिची जाने गरेका छन । त्यो सेल्फीमा च्यातिएको झण्डा आउँछ । कति पर्यटकहरूले फोटो खिच्दा नै नेपालको खिस्सा उडाउँछन् । यसको प्रदेश सरकारको पनि ध्यान गएको छैन ।