महोत्तरीको मटिहानीमा आगोले बस्ती नै सखाप

१२ वैशाख, महोत्तरी । महोत्तरीको मटिहानी नगरपालिका–६ को जरलहवा गाछी गाउँमा सल्किएको ७ घन्टापछि आगो नियन्त्रणमा आएको छ । दिउँसो १२ बजे परालको कुन्युबाट लागेको आगोले गाउँका ११० घर खरानी बनाएको छ ।

आगोले विपन्न समुदायको सिंगो गाउँनै उजडिएको छ । १२ बजेबाट सुरु भएको आगो ७ बजे नियन्त्रणमा आएको नगरपालिकाले जनाएको छ । मुस्लिम बस्तीको मियाटोलबाट परालको कुन्युमा लागेको आगो गाउँमा सल्किएपछि मियाटोल र हत्ता टोलका १ सय १० घर पूर्ण रुपमा जलेर खरानी भएको मेयर हरिप्रसाद मण्डलले जानकारी दिए ।

मटिहानी नगरपालिका, जलेश्वर नगरपालिका, रामगोपालपुर नगरपालिका, प्रदेश प्रहरी कार्यालय जनकपुरको बारुणयन्त्रसंगै नेपाली सेना, नेपाल प्रहरी, सस्शस्त्र प्रहरी, मटिहानी नगरपालिकाका कर्मचारी र स्थानीयको प्रयासपछि आगो नियन्त्रणमा आएको मेयर मण्डलले बताए ।

आगो लागेको बस्तीमा पशु चौपायासंगै स्थानीयको धनमाल पूर्णरुपमा जलेको तर अहिले क्षतिको यकिन विवरण भने भन्न नसकिने महोत्तरीका प्रमुख जिल्ला अधिकारी शिवराम गेलालले जनाकारी दिए ।