उपनिर्वाचनलाई जातीय र धार्मिक दृष्टिले हेरिए सुरक्षामा चुनौती बढ्ने प्रहरीको विश्लेषण

१३ वैशाख, काठमाडौं । नेपाल प्रहरीले शनिवार हुन गइरहेको उपनिर्वाचनलाई जातीय र धार्मिक दृष्टिले हेरिए सुरक्षा व्यवस्थामा चुनौती आउन सक्ने बताएको छ । इलाममा प्रतिनिधिसभा र बझाङमा प्रदेशसभा सदस्य उपनिर्वाचनको सुरक्षा तयारीसम्बन्धी गरिएको पत्रकार सम्मेलनमा प्रहरीले निर्वाचनलाई जातीय र धार्मिक दृष्टिले हेर्न नमिल्ने बताएको छ ।  

इलाम–२ र बझाङ १ को ‘क’ मा वैशाख १५ मा उपनिर्वाचन हुँदै छ । निर्वाचनलाई जातीय, धार्मिक, साम्प्रदायिक तथा क्षेत्रीयकरण गर्ने कार्य भइरहेको भन्दै यसबाट निर्वाचन प्रभावित हुनसक्ने प्रहरीले अनुमान गरेको छ । सो कार्य हुन नदिन प्रहरीले विशेष सुरक्षा योजना बनाएको जनाएको छ ।  

विगतका निर्वाचनका समयमा बुथ कब्जा गर्ने, पैदल तथा सडक मार्गमा अवरोध गर्ने, डर–धम्की दिने, अफवाह फैलाउने, आचारसंहिताको उल्लंघन गर्ने लगायतका क्रियाकलाप हुँदै आइरहेको छ । सो कार्य हुन नदिन प्रहरीले विगतमा जस्तै यस पटकको उपनिर्वाचनमा पनि मतदान केन्द्र तथा मतदान स्थल सुरक्षा टोली बनाएको छ । त्यस्तै, मोबाइल टोली, स्ट्राइकिङ टोली, कार्यालय सुरक्षा टोली, विशिष्ट व्यक्ति, उमेदवार र महत्वपूर्ण व्यक्तिहरूको सुरक्षा टोली बनाइएको छ ।

इलाममा पहिचान बादीका कारण केही सुरक्षा चुनौती हुन सक्ने केन्द्रीय प्रहरी प्रवक्ता डीआईजी भीमप्रसाद ढकालले बताए । शनिबार दुई क्षेत्रमा उपनिर्वाचन हुँदैछ । इलाममा पहिचानवादीका कारण केही सुरक्षा चुनौती हुनसक्छ, हामीले विशेष सुरक्षा योजना बनाएका छौँ, उनले भने । 

उपनिर्वाचनका लागि सम्भावित सुरक्षा चुनौतीलाई मध्यजनजर गर्दै सुरक्षा योजना बनाइएको भन्दै प्रहरीले इलाम २ मा १ हजार ३६३ जना र बझाङ प्रदेशसभा १ मा १ हजार २४ जना प्रहरी परिचालन हुने भएका छन् । प्रहरीले मतदान केन्द्रमा हिंसात्मक, ध्वंसात्मक र अवाञ्छित गतिविधिको पूर्वसूचना प्राप्त भएमा बल प्रयोग गरिने जनाएको छ ।