सडकको लम्बाई बढाएर ३८ लाख भ्रष्टाचार गरेको आरोपमा शाहीसहित ९ जनाविरुद्ध मुद्दा दायर

१३ वैशाख, काठमाडौं । अख्तियार दुरुपयोग अनुसन्धान आयोगले कालिकोटको महावै गाउँपालिकाका तत्कालीन गाउँपालिका उपाध्यक्ष तथा अनुगमन समितिका संयोजक मनराज शाहीसहित ९ जनाविरुद्ध भ्रष्टाचार गरेको आरोपमा मुद्दा दायर गरेको छ ।

अख्तियारले डोजरले सडक खन्ने क्रममा भएको काम भन्दा बढि मुल्यांकन गरि ३८ लाख ७६ हजार २७० बढी भुक्तानी लिएको आरोपमा विशेष अदालत काठमाडौँमा मद्दा दायर गरेको हो । सडकको गलत नापी गराई ३८ लाख बढी भ्रष्टाचार गरेको आयोगको ठहर छ । 

मद्दा दायर हुनेमा महावै गाउँपालिकाका तत्कालीन गाउँपालिका उपाध्यक्ष तथा अनुगमन समितिका संयोजक मनराज शाही, निमित्त प्रमुख प्रशासकीय अधिकृत गणेशमान सिंह, इन्जिनियर रुद्र वली, सव इन्जिनियर हरि प्रसाद पाण्डे, वडा नम्बर २ का तत्कालिन वडा अध्यक्ष गौकला सिंह, उपभोक्ता समितिका अध्यक्ष अकल सुनार, कोषाध्यक्ष जमकला काफ्ले र सचिव दधि कामी तथा महावैं गाउँपालिकाका लेखापाल मलिम रावत रहेका छन् ।
 
उनीहरूले आर्थिक वर्ष २०७५÷०७६ मा सिमखेतदेखि पादमघाटसम्म सडक निर्माण गर्दा वास्तविक लम्बाई बढाएर झुटो प्रतिवेदन तयार पारेका थिए । उनीहरूले ५२० मिटर लम्बाइ रहेको सडकलाई ८२० मिटर बनाएर सो रकम बारबर भ्रष्टाचार गरेको आयोगको दाबी छ । उनीहरूसँग सोही बराबरको सजाय माग दाबी गरिएको छ ।