गत वर्षदेखि हराएका सहसचिव कमलराज गैरे बर्खास्त

१४ वैशाख, काठमाडौं । सरकारले एक जना सहसचिवलाई जानकारी नदिई लामो समय कार्यालयमा हाजिर नभएको भन्दै जागिरबाट बर्खास्त गरेको छ । हाल कृषि तथा पशुपंक्षी विकास मन्त्रालयमा कार्यरत सहसचिव डा. कमलराज गैरेलाई जागिरबाटै बर्खास्त गरिएको हो । 

मन्त्रालयका कर्मचारीका अनुसार उनी वैशाख २ गतेदेखि सम्पर्कमा आएका थिएनन् । शुक्रबारसम्म कार्यालयमा पनि नआएको र खबर पनि नगरेको भन्दै उनलाई बर्खास्त गरिएको हो । मन्त्रालयले सूचना प्रकाशन गरी ०८० वैशाख २ गतेदेखि सम्पर्कमा नरहेको भन्दै सेवाबाट बर्खास्त गरिएको जानकारी गराएको छ । 

निजामती सेवा ऐन, २०४९ को दफा ६१ (१) को खण्ड ६ बमोजिम गैरेलाई मन्त्रिपरिषद्को निर्णयअनुसार सेवाबाट हटाइएको मन्त्रालयको सूचनामा भनिएको छ । बिहीबार मन्त्रिपरिषदको बैठक बसेको थियो ।