७७ वटै जिप्रकालाई गृहको पत्र, ‘रूग्ण र अलपत्र आयोजनाको विवरण पठाउनु’

१४ वैशाख, काठमाडौं । जिल्लामा अलपत्र छाडिएका र रूग्ण देखिएको विकास आयोजनाहरुकाे विवरण पठाउन गृह मन्त्रालयले ७७ वटै जिल्ला प्रशासन कार्यालयलाई निर्देशन दिएको छ । यस्ता आयोजनाको किन र कसरी अलपत्र र रूग्ण भए ? त्यसको एकिन विवरण माथि पठाउन गृहले पत्रमार्फत निर्देशन दिएको हो । 

मन्त्रालयले त्यस्ता अलपत्र र रूग्ण योजना र आयोजनालाई पूर्णता दिन सम्बन्धित कार्यालय र निकाय लगायत सरोकारवालासँग समन्वय एवं सहजीकरण गर्न पनि निर्देशन दिएको छ । सबै जिल्ला प्रशासन कार्यालयले यसको विवरण मन्त्रालयलाई लिखित रुपमा रिपोटिङ गर्नुपर्ने छ । 

मन्त्रालयले शुक्रबार सबै जिल्ला प्रशासन कार्यालयलाई पत्र पठाउँदै अलपत्र र रूग्ण आयोजनाको विवरण पठाउन भनेको छ । मुलुकको विभिन्न स्थानहरूमा सञ्चालित योजना तथा आयोजनाहरू पूर्ण कार्यान्वयन नभई अलपत्र र अपूरो हुन गई सार्वजनिक कोष तथा सम्पत्तिको नोक्सानी व्यहोर्नु परेको गुनासो आएको सन्दर्भमा त्यहाँ जिल्लास्थित आयोजना र योजना सञ्चालन गर्न कार्यालय र निकायसँग समन्वय गरी त्यहाँ जिल्लास्थित हाल अलपत्र र रूग्ण अवस्थामा रहेका योजना तथा आयोजनाहरूको विवरण यस मन्त्रालयमा पठाउनु हनु पत्रमा भनिएको छ ।