चुनाव जित्नेमा विश्वस्त छु : सुहाङ नेम्वाङ

१५ वैशाख, काठमाडौं । इलाम–२ मा नेकपा एमालेकातर्फबाट प्रतिनिधिसभा सदस्य उम्मेदवार सुहाङ नेम्वाङले मतदान गरेका छन् ।  

 इलाम नगरपालिका ७ स्थित महेन्द्ररत्न बहुमुखी क्याम्पसमा मतदान केन्द्रबाट नेम्वाङले मतदान गरेका हुन् । 

इलाम क्षेत्र नम्बर २ को उपनिर्वाचनका लागि बिहान ७ बजेबाट मतदान शुरु भएको हो । जिल्लामा शान्तिपूर्ण मतदान जारी रहेको बताइएको छ । मतदान गरिसकेपछि बोल्दै नेम्वाङले उत्साहको महशुस भइरहेको बताए ।

 उनले निर्वाचनकै लागि आफू डेढ वर्ष पहिला पितासँग आएको स्मरण गर्दै निर्वाचनको परिस्थितिले भावुक बनाएको पनि बताए । घरदैलो कार्यक्रममा मतदाताहरुले देखाउनुभएको मायाले जित्नेमा विश्वस्त रहेको उनको भनाई छ । 

इलाम क्षेत्र नम्बर २ मा प्रतिनिधि सभा सदस्यका लागि १९ जना उम्मेदवार चुनावी मैदानमा छन् । ७९ मतदानस्थलका १४९ मतदान केन्द्रमा मतदान जारी रहेछ । ४२ वडा रहेको इलाम २ मा १ लाख १५ हजार ८७९ मतदाता रहेका छन् । यी मतदातामध्ये ४२२ जना नयाँ मतदाता थपिएका हुन् ।