इलामको एउटा मतदान केन्द्रमा २ घण्टासम्म नक्कली मतपत्रमा मतदान

१५ वैशाख, इलाम । इलामको मतदानमा सरकारी पक्षको ठूलो कमजोरी देखिएको छ । प्रहरीको घेरा छिचोलेर मत खसाल्ने ठाउँसम्म मतदातालाई हम्मे पर्ने भएपनि भित्र भने नक्कली मतपत्रमा मतदान गराइएको खुलेको छ । 

आज भइरहेको उपनिर्वाचनमा इलामको महेन्द्र रत्न बहुमुखी क्याम्पसको मतदान केन्द्रभित्र करिब २ घण्टा मतदातालाई नक्कली मतपत्रमा छाप हाल्न लगाइएको पाइएको छ । अहिले प्रहरीले ति मतपत्र जफत गरेको छ । 

इलाम– २ मा जारी उपनिर्वाचनमा एक्जिट पोलको नाममा नक्कली मतदान गराएको पाइएको हो । मतदान केन्द्रभित्रै नक्कली मतपत्र तयार गरी मतदान गराएको पाइएपछि प्रहरीले केही सामग्रीहरू बरामद गरेको छ ।

क्याम्पसकै होस्टेलमा बसोबास गर्ने ४ जना महिला विद्यार्थीहरूलाई प्रतिव्यक्ति १५०० दिएर नक्कली मतपत्रमा छाप हाल्न लगाउने र नक्कली मतपेटिकामा सो कागज खसाल्न लगाउने गरेको पाइएको प्रहरीले जनाएको छ । प्रहरीका अनुसार यो समूहले यो काम २ घण्टासम्म सञ्चालन गरेको पाइएको छ ।

अहिले प्रहरीले मतदान केन्द्रभित्रै २ घण्टासम्म सो कार्य गर्न कसले अनुमति दियो, कसले सेटअप गर्यो भन्ने विषयमा खोजि गरिरहेको छ । आफूले नक्कली भोट खसालेर आएको भन्दै एक जना मतदाताले भनेपछि यो कुरा बाहिर आएको हो ।