सरकारका कारण संसदीय भूमिका कमजोर भयोः सभामुख

१५ वैशाख, पाल्पा । प्रतिनिधिसभाका सभामुख देवराज घिमिरेले सरकारका कारण संसद प्रभावकारी हुन नसकेको गुनासो गरेका छन् । उनले संसदीय भुमिका प्रभावकारी नहुनुमा सरकारकै हात मूख्य रहेको आरोप लगाएका छन् । संसदीय भूमिका प्रभावकारी हुन सुशासन आवश्यक रहेको तर, सरकारले सुशासन दिन नसकिरहेको सभामुख घिमिरेको भनाइ छ । 

पाल्पाको तानसेनमा पत्रकार महासंघ जिल्ला शाखाले शनिवार आयोजना गरेको पत्रकार भेटघाट कार्यक्रममा सभामुख घिमिरेले सरकारको स्थायित्व नहुँदा संसदीय व्यवस्थामा धेरै असर परेको बताए । अब निर्वाचन पद्धतिका बारेमै नै नयाँ ढंगले सोच्नुपर्ने बेला आएको र निर्वाचनलाई सरल, स्वभाविक ढंगबाट लाने प्रबन्ध गर्न सरकारले नसकिरहेको उनको भनाइ छ । 

लुम्बिनी प्रदेशसभाले पाल्पाको तानसेनमा राखेको अन्तरव्यवस्थापिका भेलामा सहभागी हुन आएका सभामुख घिमिरेले पूर्वविद्यायकी, विद्यायकी र उत्तरविद्यायकीका विषयमा छलफल हुनुपर्ने बताए । यसको महत्वलाई कार्यान्वयन गर्नका लागि अध्ययन गर्नुपर्नेमा उनको जोड थियो । संघ र प्रदेशको बीचबाट उत्तरविद्यायकी कार्यलाई अघि लैजानुपर्छ भन्ने योजना बनाउनुपर्ने सभामुख घिमिरेले बताए ।

उनले निर्वाचित जनप्रतिनिधिको स्थिर सरकार बन्नका लागि बहुमत आउने खालको प्रणालीको व्यवस्था गर्नुपर्नेमा जोड दिए । सभामुख घिमिरेले यी विषयमा समेत बहस र छलफल हुनुपर्नेमा नभएको बताए । ऐन कानुनहरु बन्नुअघि ध्यान दिनुपर्ने कुराहरु के के हुन सक्छन् र कानुन बनेपछि कार्यान्वयन कसरी भएको छ भन्ने विषयमासमेत सरकारले ध्यानदिन नसकेको उनको भनाइ छ ।

कानुन बनेपछि यसको प्रभावकारिताका विषयमासमेत संघीय र प्रदेशसभाका सभामुख, उपसभामुखले सरकारलाई निर्देशन र सहयोग गर्नुपर्ने बताए । ‘कानुन कार्यान्वयन गर्नका लागि सरकारले केके कुरामा ध्यान दिनुपर्छ,’ उनले भने, ‘सुधार्नुपर्ने वा संशोधन गर्नुपर्ने भएमा कार्यान्वयनमा के समस्या देखियो भन्ने विषयमासमेत ध्यान दिनुपर्छ ।’