कार्कीको प्रदेश प्रमुखलाई पत्र, ‘धारा १६८ को उपधारा ५ बमोजिमको सरकार संकल्प प्रस्तावले ढल्दैन’

१८ वैशाख, विराटनगर । कोशी प्रदेशका मुख्यमन्त्री केदार कार्कीले अहिलेको सरकारलाई कानुन अनुसार परास्त गर्न नसकिने दावी गरेका छन् । उनले संविधानले संकल्प प्रस्तावकै आधारमा सरकार परिवर्तन गर्ने आधार नदिएको जिकिर गरेका छन् । प्रदेश प्रमुख पर्शुराम खापुङलाई संकल्प प्रस्ताव पारित गराएर सरकार फेरबदलको प्रयास हुन नसक्ने उनले जानकारी गराएका हुन् ।  

संविधानको धारा १६८ को उपधारा ५ बमोजिम गठन भएको कार्की नेतृत्वको सरकार अल्पमतमा परेको भन्ने दाबीसहित नयाँ गठबन्धन दलले प्रदेशसभाबाट संकल्प प्रस्ताव पारित गराएका थिए । त्यो प्रक्रियाबाट सरकार गठन गर्न प्रदेश प्रमुख खापुङलाई सन्देशका नाममा निर्देशन दिन नसक्ने जिकिर गर्दै मुख्यमन्त्री कार्कीले मंगलबार लिखित जानकारी गराएका छन् ।  
 
कार्कीले संविधानको धारा १७३ ’घ’ मा भएको व्यवस्था अनुरुप मुख्यमन्त्रीले समसामयिक विषयमा प्रदेश प्रमुखलाई जानकारी गराउने व्यवस्था रहेको कुरा अवगत गराएको भन्दै सोही व्यवस्थाअनुसार आफूले बेलाबेलामा प्रदेश प्रमुखको  ध्यानाकर्षण गर्दै आएको बताएका छन् । उनले आज प्रदेश प्रमुखलाई पत्र बुझाउँदै संकल्प प्रस्तावले सरकार परिवर्तन गर्न नमिल्ने जानकारी गराएका हुन् ।