आनन्द वनको डढेलो नियन्त्रणमा कठिनाई, अस्पतालका ९३ बिरामी अन्यत्रै सारिए

१८ वैशाख, काठमाडौं । ललितपुरको गोदावरी नगरपालिका–६ स्थित आनन्द वनमा लागेको डढेलो निभाउन कठिन हुँदै गएको छ । अहिले सबै शक्ति लगाएर डढेलो निमन्त्रणमा लिने प्रयास भइरहेको छ । आगो फैलिँदै गएपछि बन नजिकै रहेको कुष्ठरोग अस्पतालका बिरामीलाई अन्यत्र सारिएको छ ।

डढेलो फैलिएपछि अस्पताल पनि जोखिममा परेको छ । त्यहाँ रहेका ९३ जना बिरामी सारिएको हो । जिल्ला प्रहरी परिसर ललितपुरका अनुसार अहिले प्रमुख जिल्ला अधिकारीसहित सुरक्षा अधिकारी अस्पतालमा पुगेका छन् । आगो नियन्त्रणका लागि सेना, सशस्त्र, नेपाल प्रहरी, अग्नि नियन्त्रकसहितको टोली परिचालन गरिएको छ ।

लेलेतर्फको जंगलको डढेलो फैलिँदै आनन्द वनसम्म आइपुगेको हो । आनन्द वन अस्पतालको करिब ७ सय मिटर नजिकै डढेलो आइपुगेको प्रहरीले जनाएको छ । आनन्द वन अस्पतालमा कुष्ठरोगीहरुको उपचार हुने गर्दछ । डढेलो निभाउने क्रममा २ जना घाइते भएका छन् । 

गोदावरी नगरपालिका–४ बडिखेल जंगलमा डढेलो निभाउने क्रममा उनीहरु घाइते भएका हुन् । यस क्रममा स्थानीय शंकर पहरी र रमेश पहरी घाइते भएको जिल्ला प्रहरी परिसर ललितपुरले जनाएको छ ।