राष्ट्र बैंकको कारबाहीमा परे लुम्बिनी विकास र एक्सल डेभलपमेन्ट बैंक

२० वैशाख, काठमाडौं । नेपाल राष्ट्र बैंकले तोकिएको निर्देशन विपरीत वित्तीय कारोबार गरेको भन्दै दुई विकास बैंकमाथि कारवाही गरेको छ । उनीहरुलाई सम्पत्ति शुद्धीकरण निवारण सम्बन्धी व्यवस्था उल्लंघन गरेको आरोपमा कारबाही गरिएको छ । 

यसरी कारबाहीमा पर्नेमा लुम्बिनी विकास बैंक र एक्सल डेभलपमेन्ट बैंक रहेका छन् । लुम्बिनी विकास बैंकमा राष्ट्र बैंकको निर्देशनअनुसार वित्तीय संस्थामा ग्राहक पहिचान तथा सम्पुष्‍टि पर्याप्त मात्रामा हुन नसकेको र सोही निर्देशनमा उल्लेख भएबमोजिम शंकास्पद कारोबार तथा गतिविधि पहिचान गर्ने प्रणाली पूर्णरूपमा लागु हुन नसकेको पाइएको राष्ट्र बैंकले जनाएको छ ।

सोही कारण लुम्बिनीलाई नेपाल राष्ट्र बैक ऐन, २०५८ को दफा १०० को बुँदा नम्बर १ (क) र बैंक तथा वित्तीय संस्थासम्बन्धी ऐन, २०७३ को दफा ९९ को बुँदा नम्बर १ (क) बमोजिम सचेत गराइएको हो । आगामी महिनाको वित्तीय विवरण सार्वजनिक गर्दा गल्ती नदोहर्याउन भनिएको छ । 

यस्तै एक्सल डेभलपमेन्ट बैंकले पनि राष्ट्र बैंकले जारी गरेको सम्पत्ति शुद्धीकरण निवारण सम्बन्धी व्यवस्था कार्यान्वयन नगरेकाले सोही बुँदाअनुसार सचेत गराइएको जनाएको छ । राष्ट्र बैक ऐन, २०५८ को दफा १०० को बुँदा नम्बर १ (क) र बंैक तथा वित्तीय संस्थासम्बन्धी ऐन, २०७३ को दफा ९९ को बुँदा नम्बर १ (क) बमोजिम सचेत गराइएको हो । यसलाई पनि वित्तीय विवरणमा सुधार नभए जरिवनासहित कारवाही गर्ने राष्ट्र बैंकको चेतावनी छ ।