पत्रकार महासंघको २७ औँ महाअधिवेशन काठमाडौंमा जारी

२१ वैशाख, काठमाडौं । ३१ औँ विश्व प्रेस स्वतन्त्रता दिवसको अवसर पारेर नेपाल पत्रकार महासंघले आयोजना गरेको २७ औँ महाधिवेशन काठमाडौंमा सुरु भएको छ । विश्वका लागि प्रेसः वातावरणीय संकटको सामनामा पत्रकारिता नाराका साथ आज नेपालसहित विश्वभर यो दिवस मनाइँदैछ । 

महासंघको २७ औँ महाधिवेशन प्रधानमन्त्री पुष्पकमल दाहाल प्रचण्डले उद्घाटन गरेका छन् । यसअघि विश्व प्रेस स्वतन्त्रता दिवसका अवसरमा आजै बिहान महासंघको अगुवाइमा प्रभातफेरी आयोजना गरिएको थियो । महासंघको २७ औँ महाधिवेशन समेतका अवसरमा आयोजित प्रभातफेरी रत्नपार्क शान्तिबाटिकाबाट सुरु भई भृकुटीमण्डपस्थित महाधिवेशनस्थल राष्ट्रिय सभागृहमा पुगेर समापन गरिएको थियो ।

प्रभातफेरीमा नेपाल पत्रकार महासंघका अध्यक्ष विपुल पोखरेल, पदाधिकारी, पूर्वअध्यक्ष, विभिन्न सञ्चारगृहमा आबद्ध पत्रकारहरुको सहभागिता थियो । प्रभातफेरीमा नेपाल प्रेस युनियन, प्रेस चौतारी नेपाल, प्रेस सेन्टर नेपाल, समाजवादी प्रेस संगठन नेपाललगायत संघसंगठनका पदाधिकारी तथा सदस्यहरूको सहभागिता थियो ।

संयुक्त राष्ट्रसंघीय शैक्षिक, वैज्ञानिक तथा सांस्कृतिक संगठन (युनेस्को) को आयोजनामा अफ्रिकी राष्ट्र नामिबियाको विन्डहक सहरमा भएको पत्रकारहरुको सम्मेलनले ‘बहुलवादी र स्वतन्त्र प्रेसको लागि घोषणापत्र’ जारी गरेको सम्झनामा सन् १९९३ देखि संयुक्त राष्ट्रसंघले यो दिवस मनाउने निर्णय गरेको हो ।

जनताको सधैँ सबै प्रकारका सूचनामा पहुँच हुनुपर्छ र पत्रकारहरूलाई आफ्नो काम गर्न सुरक्षित वातावरण सृजनामा सरकारले सहयोग गर्नुपर्छ भन्ने बुझाउन पनि यो दिवस मनाउन थालिएको हो । महासंघको महाधिवेशन उद्घाटनपछि बन्दसत्र सुरु हुनेछ । बन्दसत्रमा पत्रकारिता क्षेत्रमा देखिएका समस्या र महासंघका आगामी कार्यक्रमबारे छलफल हुनेछ । 

महाधिवेशनमा देशभरका शाखाबाट प्रतिनिधिहरु काठमाडौं आएका छन् । २७ औँ महाधिवेशनका क्रममा वरिष्ठ पत्रकारहरुलाई विभिन्न विधामा सम्मान गरिएको छ । प्रधानमन्त्री प्रचण्डले उनीहरुलाई सम्मान पत्रसहित सम्मान गरेका थिए ।