पार्टी एकता गर्ने निहुँमा रेशम र रञ्जिताले करोडौँ रकम उठाएर खाए: महतो

२१ वैशाख, काठमाडौं । नेपाल सद्भावना पार्टीका अध्यक्ष रामकुमार महतोले नागरिक उन्मुक्ति पार्टी व्यापारीकरण भएको आरोप लगाएका छन् । उनले नागरिक उन्मुक्ति पार्टी व्यापारीकरणमा परिणत भएकोले सो पार्टीसँग एकता भंग गरी नेसपा मार्फत पुनः आफ्नो गतिविधि अगाडि बताएका हुन् ।

नेसपाले बिहीबार काठमाडौंस्थित मधेश मिडिया हाउसमा पत्रकार सम्मेलन गरी अध्यक्ष महतोले नागरिक उन्मुक्ति पार्टीसँग जुन उद्देश्य, मुद्दा र सहमतिका एकीकरण भएको थियो, त्यसअनुसार चल्न नसकेको उनको आरोप थियो । नागरिक उन्मुक्ति पार्टी र नेपाल सद्भावना पार्टीबीच गत साउन २० गने एकीकरण घोषणा भएको थियो ।

नाउपाको गत पुसमा टीकापुरमा भएको राष्ट्रिय महाधिवेशनमा आफ्ना नेता कार्यकर्तासँग करोडौं रुपैयाँ असुलेको आरोप लगाउँदै अध्यक्ष महतोले भने, ‘महाधिवेशनमा नाउपाले करोडौं रुपैयाँ उठाएको छ । हिसाब दिने बेलामा श्रीमान–श्रीमतिले विभिन्न बहाना बनाएर पार्टीलाई ने समाप्त पार्ने अवस्थामा हामीले यही वैशाख ३ गते त्यो एकतालाई भंग गरेर नेपाल सद्भावना पार्टी अलग भइसकेको छ ।’

नेपाल सद्भावना पार्टी अब आफ्नै गतिविधि सञ्चालन गर्ने अध्यक्ष महतोले जानकारी दिएका छन् । साथै उनले नेसपाको केन्द्रीय कार्यकारिणी समितिले गरेका निर्णयहरूसमेत सार्वजनिक गरेका थिए ।

नेपाल सद्भावना पार्टीका निर्णयहरुः

मितिः२०८१ वैशाख १९ गते नेपाल सद्भावना पार्टीको केन्द्रीय कार्यालय जनकपुरधाममा बसेको पार्टीको केन्द्रीय कार्यकारिणी समितिको बैठकबाट निम्न निर्णयहरू गरिएको छ ।

१. यस नेपाल सद्भावना पार्टीमा नेपाल सरकारका पूर्व शिक्षा मन्त्री रामचन्द्र कुशवाहा ज्यू (पर्सा), नेपाल समाजवादी पार्टीका सह–अध्यक्ष एवं नेपाल सरकारका पूर्व राज्यमन्त्री गोविन्द प्रसाद चौधरी (नवलपरासी) तथा नेपाल समाजवादी पार्टीका महासचिव सुरेन्द्र कुमार पटेल (नवलपरासी) उक्त पार्टीका केन्द्रीय सदस्यहरू पिताम्बर महतो, ओम थनेत (पूर्वी परासी), सज्नु चौधरी रुपन्देही, प्रभा चौधरी दाङ्ग, मञ्जु चौधरी लुम्बिनी प्रदेश अध्यक्ष र लोसपा नेपालका केन्द्रीय सदस्यहरू ओम प्रकाश गुप्ता दाग, रामबाबु सिंह महोत्तरी र नाउपाका केन्द्रीय सदस्य रामकुमार चौधरी बर्दिया, नेसपाका नेताहरू सुभाषचन्द्र कौशल, देवेन्द्र चौधरी, सञ्जु चौधरी (नवलपरासी) र तत्कालीन राजपा नेपालका केन्द्रीय सदस्यहरू त्रिनारायण राजवंशी झापा, जिपी सिंह सप्तरी, जयदेव चौधरी कैलाली साथै रामचन्द्र कुशवाहा ज्यूको समर्थकहरू पर्साबाट अशोक प्रसाद कुशवाह, महन्था महतो, हर्दियानन्द महतो, प्रवीण मेहता, हरि प्रसाद शाह, रामशकल महतो लगायत विभिन्न पार्टी परित्याग गरी यस पार्टीमा प्रवेश गर्नु भएकोमा उहाँहरूलाई हार्दिक स्वागत गर्ने निर्णय गरियो ।

२. नेपाल सरकारका पूर्व मन्त्री तथा यस नेपाल सद्भावना पार्टीका पूर्व अध्यक्ष सरिता गिरी ज्यूलाई संघीय विज्ञ परिषदका संयोजक पदमा चयन गर्ने निर्णय गरियो ।

३. मधेसका विभिन्न जिल्लाहरू महोत्तरीको मठियानी नगरपालिका, सप्तरीको महादेवा गाउँपालिका लगायत विभिन्न स्थानहरूमा भीषण आगलागीबाट व्यापक जनधनको क्षति भएको म यस नेपाल सद्भावना पार्टी परिवार लाई गम्भीर ध्यानाकर्षण भएको छ। भीषण आगलागीबाट पीडित जनसमुदायमा सम्बन्धित निकाय गम्भीर नदेखिएको हाम्रो ठहर छ। भीषण आगलागीबाट कठिनाईका सामना गर्नु भइरहेका जनसमुदायहरूलाई यथाशीघ्र गाँस, बास, कपास लगायतको उचित क्षतिपूर्ति लगायत राहतको व्यवस्था मिलाउन नेपाल सरकार, प्रदेश सरकार र स्थानीय निकाय सँग जोरदार माग गर्ने र भीषण आगलागीबाट पीडित जनताहरुप्रति विभिन्न दात्री निकाय संघ / संस्था एवं सहयोगी व्यक्तिहरूमा यथा सम्भव सक्दो सहयोग गर्नु हुन आग्रह गर्नुका साथै यस पार्टीका नेता कार्यकर्ता उक्त स्थानमा आवश्यक राहत लगायतको सहयोगमा जुट्न निर्देशन गर्ने निर्णय समेत गरियो । हावाहुरीका लगायत विभिन्न कारणबाट भीषण आगलागीको परिस्थितिबाट गुज्रनु परेका जनसमुदायहरू बिचल्लीत नभई धैर्यताका साथ आफ्ना दैनिकी जीवन यापन गर्न आग्रहका साथै यस्ता भीषण आगलागी वाट वचन बचाउन आवश्यक सतर्कता अपनाउन समेत आग्रह गर्ने निर्णय गरियो ।