राज्यलाई कर तिरेका जनताले यसको खर्चबारे जानकारी पाउनुपर्छः राष्ट्रपति

२२ वैशाख, काठमाडौँ । राष्ट्रपति रामचन्द्र पौडेलले सूचनाको हक प्रयोग गर्न नदिने सरकार लोकतान्त्रिक हुन नसक्ने बताएका छन् । उनले सरकारी तहबाट अझै पनि सूचना लुकाउने काम भइरहेको गुनासो जनताबाट आइरहेको बताएका छन् । लोकतन्त्रप्रति जनताको भरोसा जागृत गराउने उपयुक्त औजार नै सूचनाको हक भएको उनको भनाइ छ । 

राष्ट्रिय सूचना आयोगको १७ औं स्थापना दिवसका अवसरमा राष्ट्रपति भवन शीतलनिवासमा शनिबार आयोजित कार्यक्रमलाई सम्बोधन गर्दै उनले सरकारले गरेका काम, कारबाहीबारे जनताले थाहा पाउनु पर्ने बताए । उनले जनताले निगरानी गर्न नपाउने कुरा अब असम्भव हुँदै गएको बताए । 

जनताले आफूले तिरेको कर कहाँ, कसरी खर्च भइरहेको छ भनेर जान्न पाउने उनीहरूको स्वभाविक हक भएको उनको भनाइ छ । सरकारले आफूबाट उठाएको पैसा केमा र कसरी खर्च गरेको छ भन्ने कुराको जानकारी जनताले लिनुपर्ने बताए । 

उनले लोकतन्त्रको संस्थागत विकास, सुशासन प्रवर्द्धन तथा विकास निर्माणमा जनताको अर्थपूर्ण सहभागिताका लागि सूचनाको हकको कार्यान्वयन थप प्रभावकारी बनाउनुपर्नेमा उनले जोड दिए । सूचनाको हकले नागरिकको सशक्तीकरण मात्र नभई सरकारलगायत सबै सार्वजनिक निकायलाई जिम्मेवार पनि बनाउने  बताए ।

उनले कानून कार्यान्वयन हुनुमा आयोग तथा सूचनाको हकका अभियन्ताहरूको अथक मेहनत प्रभावकारी भएको बताए । सार्वजनिक निकायका पदाधिकारी तथा कर्मचारीहरूको आफूलाई रुपान्तरण गर्दै लैजाने सोचबाट यसको कार्यान्वयनमा सन्तोषजनक अवस्था देखिए पनि संविधान र कानुनले राखेको पवित्र उद्देश्य पूरा हुने अवस्था अझै नबनेको बताए ।