गोप्य राख्नुपर्ने बजेटको प्रधानमन्त्रीले पहिले नै बताइदिए आकार र आन्तरिक कुरा

२२ वैशाख, काठमाडौं । सामान्यतया नयाँ आर्थिक वर्षको बजेट बनाउँदा गोपनीयता अपनाउने गरिन्छ । बजेट बनाउने टीमलाई समेत बाहिरी वातावरण र जमघटमा घुलमिल हुन नदिने चलन छ । धेरै कुराले गर्दा बजेटको अन्तिम तयारी सकेर सार्वजनिक गर्नुभन्दा पहिले यसको आकार र बजेटले निर्धारण गरेका करका दर र दायरालाई गोप्य राख्नुपर्ने हुन्छ । 

तर शनिबार पार्टीको बैठकमा प्रधानमन्त्री एवं नेकपा माओवादीका अध्यक्ष पुष्पकमल दाहाल प्रचण्डले आगामी आर्थिक वर्षका लागि तयारी अवस्थामा रहेको बजेट १८ देखि १९ खर्बभित्र आउने जानकारी दिए । माओवादी केन्द्रको संसदीय दलको बैठकमा उनले बजेट सिलिङ बनिसकेको र त्यसको तयारीका क्रममा राजश्वका दरहरू मिलाउने काम भइरहेको बताए । 
 
उनले बैठकमा जनतालाई आशा भरोसा जगाउने खालको बजेट बनिरहेको र राजश्व बढाउने उपायको खोजी भइरहेको जानकारी दिए । दलका सांसदहरूलाई सम्बोधन गर्दै प्रचण्डले योजना आयोगले दिएको सिलिङभन्दा बजेट बढेर आउने बताए । उनको भनाइबारे जानकारी दिँदै एक नेताले नेपालबहससँग भने,‘१८ खर्बको बजेट ल्याउने निश्चित भए पनि त्यसमा एक खर्ब थप्नुपर्ने देखियो ।’ 

जनतालाई आशा र भरोसा बढाउने लोकप्रिय बजेट बनाइएको भन्दै उनले बजेट निर्माण गर्दा कृषिमा आधारित उद्योगलाई प्राथमिकता दिएको बताए । उनले दलका सांसदहरूलाई नीति तथा कार्यक्रम र बजेट रचनात्मक, प्रभावकारी बनाउनका लागि सुझाव समेत मागेका थिए ।