गण्डकीका मुख्यमन्त्री अधिकारीको विश्वासको मतविरुद्ध कांग्रेस आज सर्वोच्चमा

२४ वैशाख, काठमाडौं । नेपाली कांग्रेस गण्डकी सरकार विरुद्ध फेरी सर्वोच्च अदालत जाने भएको छ । सोमबार कांग्रेसले सर्वोच्चमा रिट दायर गर्न लागेको हो । गण्डकीका मुख्यमन्त्री खगराज अधिकारीलाई विश्वासको मत नपुगी बहुमत घोषणा गरिएको र यो संविधान विपरीत भएको कांग्रेसले बताएको छ । 
 
आइतबार गण्डकीका सभामुख कृष्ण धितालले ६० सदस्यीय प्रदेशसभामा ३० सीटलाई बहुमत मानेर अधिकारीले विश्वासको मत पाएको घोषणा गरेका थिए । उनले अदालतको फैसला अनुसार ३० मत बहुमत हुने बताएका थिए । आफूसँग पनि मत हाल्न पाउने अधिकार रहेको सभामुखको जिकिर थियो । 

प्रदेश सभा बैठकमा मुख्यमन्त्री अधिकारीले राखेको विश्वासको मतको प्रस्तावको पक्षमा ३० मत परेको थियो भने विपक्षमा २७ तथा २ जना तटस्थ बसेका थिए । ३१ सीट बहुमतका लागि चाहिने गण्डकीमा सभामुखले ३० लाई नै बहुमत घोषणा गरेपछि कांग्रेस अदालत जान लागेको हो । कांग्रेसले उक्त घोषणा विरुद्ध आज सर्वोच्चमा रिट दायर गर्ने दलका नेता सुरेन्द्रराज पाण्डेले जानकारी दिएका छन् ।