सत्ताको दवावमा सरकारी वकिल, अखिलकी अध्यक्ष सिंहसहित ५ जनाविरुद्ध मुद्दा नचलाइने

२४ वैशाख, काठमाडौं । सत्ता र शक्तिको प्रभाव र दवावले हत्या अभियोग लागेका सत्तारुढ माओवादीको भातृ संगठन अखिल क्रान्तिकारीकी अध्यक्ष पञ्चा सिंहविरुद्ध मुद्दा नचलाउने निर्णय भएको छ । सरकारी वकिलले उनी विरुद्ध मुद्दा नचलाउने निर्णय गरेको हो । 

स्रोतका अनुसार प्रधानमन्त्री पुष्पकमल दाहाल प्रचण्डको दवावमा सरकारी वकिलले उनीसहित पाँच जनाविरुद्ध मुद्दा नचलाउने निर्णय गरेको हो । प्रधानमन्त्री प्रचण्डको सचिवालयले जिल्ला सरकारी वकिलको कार्यालय, सुर्खेतमा पटक पटक मुद्दा नचलाउन दवाव सिर्जना गरेको थियो । 

दवावपछि उनीसहित ५ जनाविरुद्ध मुद्दा चलाउन पर्याप्त प्रमाण नभएको भन्दै मुद्दा नचलाउने निर्णय गरिएको हो । निर्णयअनुसार सिंहसहित गुराँस भन्ने बालकृष्ण सिंह, टंकबहादुर सिंह, सुवास भन्ने वीरबहादुर मल्ल, अशोक भन्ने अली कार्कीविरुद्ध मुद्दा नचल्ने भएको हो ।

अनुसन्धानको क्रममा बुझिएको प्रमाणका आधारमा मुद्दा चलाउनुपर्ने आधारहरू नदेखिएकाले यो निर्णय गरिएको सरकारी वकिलको कार्यालयले जनाएको छ । पूरक जाहेरीमा उल्लेख भएकामध्ये टाइगर भनिने पदमबहादुर रावत र नरेश सिंह भन्ने मेहरमान सिंहविरुद्ध भने मुद्दा दायर भएको छ । 

उच्च सरकारी वकिलको कार्यालयका सहन्यायाधिवक्ता रुद्रप्रसाद पन्थीले पनि मुद्दा नचलाउने निर्णय सदर गरिदिन भन्दै पत्राचार भएको बताए ।  कालिकोटमा २६ फागुन २०६५ मा राजबहादुर मल्ल खुकुरी प्रहार गरी हत्या भएको थियो । यो प्रकरणमा १५ वर्षपछि अखिल क्रान्तिकारीकी अध्यक्ष सिंहसहित ६ जनालाई पक्राउ गर्न जिल्ला अदालत सुर्खेतले पक्राउ पुर्जी जारी गरेको थियो ।

प्रहरीले यसअघि जिल्ला अदालतबाट २०७९ मा पनि उनीहरुविरुद्ध पक्राउ पुर्जी लिएको थियो । १३ साउन २०७९ मा सिंहसहितका व्यक्तिहरू हत्यामा संलग्न रहेको भन्दै जिल्ला प्रहरी कार्यालय, सुर्खेतमा पुरक जाहेरी दर्ता भएको थियो । राजबहादुर मल्लको २०६५ फागुन २६ गते साँझ सुर्खेत बसपार्कमा खाना खाएर कोठातर्फ जाँदै गर्दा बाटोमै आक्रमण भएको थियो । खुकुरी प्रहारबाट गम्भीर घाइते भएका उनको  सुर्खेत वीरेन्द्रनगरको बुद्धपथस्थित देउती अस्पतालमा उपचारकै क्रममा मृत्यु भएको थियो ।

मृतकका बुवा नन्दबहादुर मल्लका अनुसार विद्यार्थी राजनीतिमा सक्रिय रहेका राजबहादुर स्वतन्त्र विद्यार्थी युनियन (स्ववियु) का सचिव थिए । स्ववियु सचिव हुँदा माओवादी निकट अखिल क्रान्तिकारीका विद्यार्थीहरूसँग उनको विवाद बढेको थियो । यसपछि उनको हत्या गरिएको हो । यही विषयमा दर्ता भएको मुद्दा नचलाउन प्रधानमन्त्रीकै तहबाट दवाव आएपनि सरकारी वकिलको कार्यालय पछि हटेको हो ।