पार्टी विभाजनको हल्ला चलेपछि तीन कमिटीको बैठक सारेर दलको बैठकमा छलफल गर्दै नेकपा एस

२४ वैशाख, काठमाडौं । नेकपा एकीकृत समाजवादीले स्थायी, पोलिटब्युरो र केन्द्रीय कमिटी बैठक सारेर संसदीय दलमा छलफल गरिरहेको छ । पार्टी विभाजनको हल्ला चलेपछि अध्यक्ष माधवकुमार नेपालले आज संसदीय दलको बैठक बोलाएका थिए । बैठक काठमाडौंको बानेश्वरस्थित संसदको शंकर हलमा बैठक बसिरहेको छ ।

यसअघि वैशाख २६ गते स्थायी कमिटी, २७ गते पोलिटब्युरो र २८, २९ गते केन्द्रीय कमिटी बैठक बस्ने तय भएको थियो । तर, पार्टीमा अर्कै हल्ला चल्न थालेपछि ति बैठक स्थगित गरेर सोमबार संसदीय दलको बैठकमा आगामी एजेन्डाबारे छलफल गरिएको हो । बैठकमा अध्यक्ष नेपालले नेताहरूलाई सम्झाउने काम गरिरहेका छन् । 

अब वैशाख २९ गते स्थायी कमिटी, ३० गते पोलिटब्युरो बैठक बस्नेछ । वैशाख ३१ र जेठ १ गते केन्द्रीय कमिटी बैठक बस्ने भएको छ । नेकपा एसले आगामी असार १६ देखि २० गतेसम्म काठमाडौंमा महाधिवेशन गर्दैछ । त्यसको छलफलका लागि बैठक बस्न लागेको हो । आन्तरिक तयारी नपुगेका कारण बैठक सारिएको प्रचार विभागले जनाएको छ ।

संसदीय दलमा संसदको बजेट अधिवेशनबारे छलफल भइरहेको बताइएको छ । आइतबार मात्रै सत्तारुढ जनता समाजवादी पार्टी, नेपाल विभाजन भएको छ । एकीकृत समाजवादीको विभाजनको चर्चा समेत हुन थालेको छ । सोही अवस्थामा बैठक बसेको हो ।