यादव नेतृत्वको जसपा संसदीय दलको बैठक आज

२५ वैशाख, काठमाडौं । जनता समाजवादी पार्टी (जसपा) को संसदीय दलको बैठक बस्ने भएको छ । पार्टी अध्यक्ष तथा उपप्रधान तथा स्वास्थ्यमन्त्री उपेन्द्र यादव स्वदेश फर्किएपछि दलको बैठक बस्न लागेको हो । अध्यक्ष यादवले भ्रमणको बेला कतारबाट फोन गरेर संसदीय दलको बैठक बोलाएका थिए । 

संयुक्त राष्ट्र संघीय जनसंख्या तथा विकास आयोगको ५७ औँ  बैठकमा भाग लिएर अमेरिकाबाट यादव स्वदेश फर्किसकेका छन् ।  उनी विदेशमा रहँदा जसपा नेपालबाट अलग भई अशोक राईसहितका नेताले नयाँ दल दर्ता गराएका छन् । पार्टी विभाजनसहित पछिल्लो राजनीतिक घटनाक्रमबारे छलफल गर्न मंगलबार केन्द्रीय कार्यालय बालकुमारीमा जसपा नेपालको संसदीय दलको बैठक बस्न लागेको हो । 
 
सोमबार अशोक राईको नेतृत्वमा दर्ता भएको नयाँ दलले प्रमाणपत्र पाएको छ । निर्वाचन आयोगले जसपा नेपालबाट विभाजित भई बनेको जनता समाजवादी पार्टीलाई दर्ताको प्रमाणपत्र दिएको हो । राईले प्रतिनिधिसभाका सात सांसदसहित आइतबार दल दर्ताको निम्ति आयोगमा निवेदन दिएका थिए । 

उपेन्द्र यादव नेतृत्वको जसपा, नेपालका १२ प्रतिनिधिसभा सदस्यमध्ये ७ सांसदले नयाँ दल दर्ताका लागि हस्ताक्षर गरेका थिए । निवेदन दिइएको २४ घण्टा नबित्दै आयोगले दल दर्ता गर्दै प्रमाणपत्र दिएको हो ।