उपेन्द्रले अब प्रधानमन्त्रीलाई साथ दिन्छन कि छोड्छन ?

२५ वैशाख, काठमाडौं । आफू देशमा नरहेका बेला पार्टी विभाजन भएपछि अलमलमा परेका जनता समाजवादी पार्टी (जसपा) का अध्यक्ष एवं उपप्रधानमन्त्री उपेन्द्र यादवले मंगलबार बिहान बालुवाटार पुगेर प्रधानमन्त्री पुष्पकमल दाहाल प्रचण्डलाई भेटेका छन् । 

प्रधानमन्त्री प्रचण्ड र उनी बीचको छलफलमा प्रधानमन्त्रीले परिस्थिति अचानक बदलिएको बताएका थिए । जसपा विभाजन हुने कुरामा आफूले जानकारी नपाएको र अचानक फुटेको कुरा सार्वजनिक भएको बताएका थिए । आफू नभएको बेला सत्ता पक्षले नै पार्टी फुटाएको गुनासो उपेन्द्रले गरेका थिए । 

फुटेर गएको समूहलाई निर्वाचन आयोगले हतारमा मान्यता दिएको र दल दर्ता प्रक्रिया अगाडि बनाएको भन्दै उनले आपत्ति जनाएका थिए । दल दर्ता सम्बन्धी कानुन नै नभएको अवस्थामा आयोगले दल दर्ता गर्नु संविधान विपरीत भएको यादवले बताएका थिए । 

प्रधानमन्त्रीको सचिवालय स्रोतका अनुसार प्रधानमन्त्रीले जे भएपनि मिलेर जानुपर्ने बताएका थिए । यादवले भने पटक पटक सत्ता समीकरण भित्रबाटै आफूमाथि आघात भएको बताएका थिए । प्रधानमन्त्री प्रचण्ड र नेकपा एमालेका अध्यक्ष केपी शर्मा ओलीले भने यादवलाई सरकारबाट हटाएर नयाँ दललाई सहभागी गराउने तयारी गरिरहेको बुझिएको छ । 

आजको भेटमा उपेन्द्र यादवले सरकारमा रहने वा छोड्ने भन्ने विषयमा कुरा नभएको स्रोतको भनाइ छ ।  पार्टी फुटेपछि गए राति मात्र स्वदेश फर्किएका यादवले लगत्तै प्रधानमन्त्रीसँग भेट गरेका हुन् । स्वास्थ्य तथा जनसंख्यामन्त्री समेत रहेका यादव पार्टी विभाजनपछि सरकारमा सहभागी हुने या नहुने बारे परामर्शमा छन् । यादवले आजै पार्टीका नेताहरूसँग विभाजनका विषयमा छलफल गर्ने भएका छन् ।