केन्द्रीय कार्यकारिणीको बैठकपछि अदालत जाँदै जसपा नेपाल

२६ वैशाख, काठमाडौं । पार्टी विभाजनविरुद्ध जनता समाजवादी पार्टी (जसपा) नेपाल आज अदालत जाने तयारी गरेको छ । उपेन्द्र यादव नेतृत्वको जसपा नेपाल पार्टी विभाजनविरुद्ध अदालत जाने औपचारिक निर्णय गर्न आज केन्द्रीय कार्यकारिणी बैठक बस्दैछ । पार्टी केन्द्रीय कार्यालय बालकुमारी ललितपुरमा बस्ने बैठकले यसबारे औपचारिक निर्णय गर्ने छ ।

अशोक राईको नेतृत्वमा ७ सांसद र ३० केन्द्रीय सदस्यको माग अनुसार नयाँ दल दर्ता गराएको विषयमा अदालत जाने तयारी गरेको प्रवक्ता मनिष सुमनले बताए ।

पार्टी विभाजनको विषयमा आज पत्रकार सम्मेलन गरेर जानकारी गराउन लागेको प्रवक्ता सुमनले बताए । उनका अनुसार आज बिहान साढे ११ बजे पार्टीको केन्द्रीय कार्यालय बालकुमारीमा पत्रकार सम्मेलन राखिएको छ ।

दल विभाजन सम्बन्धी कानून नै नभएको बेलामा निर्वाचन आयोगले पार्टी विभाजनलाई मान्यता दिएको प्रति जसपा नेपालको असन्तुष्टि छ। मंगलबार बसेको शीर्ष नेताहरूको बैठकले पार्टी विभाजनबारे कानूनी उपचार खोज्ने निष्कर्ष निकालेको थियो ।