तथ्यांक नआएको भन्दै मौद्रिक नीति समीक्षा अवधि बढाइयो, संशोधन भयो कार्यविधि २०७३

२६ वैशाख, काठमाडौं । नेपाल राष्ट्र बैंकले मौद्रिक नीतिको समीक्षा अवधि बढाएर ४५ दिन पुर्याएको छ । यसअघि हरेक त्रैमास समाप्त भएको ३० दिनभित्र सार्वजनिक गरिँदै आएको थियो ।  राष्ट्र बैंकका अनुसार यसलाई सञ्चालक समितिबाट पारित गराउन बाँकी छ । यो पारित भएपछि वार्षिक मौद्रिक नीति हरेक आर्थिक वर्ष सुरु भएको १५ दिनभित्र र त्रैमासिक तथा अर्धवार्षिक समीक्षा हरेक त्रैमास समाप्त भएको ४५ दिनभित्र सार्वजनिक गरिनेछ । 

चैतसम्मको तथ्यांक विश्लेषण गरेर मौद्रिक नीति तर्जुमा मस्यौदा तयार हुने र त्यसमा व्यवस्थापन समिति र सञ्चालक समितिको छलफलपछि मात्र सार्वजनिक हुने राष्ट्र बैंकले जनाएको छ । बैंकले मौद्रिक नीति तर्जुमा कार्यविधि २०७३ संशोधन गरेर त्रैमासिक समीक्षा अवधि १५ दिन बढाएर ४५ दिन पुर्याएको हो । यद्यपि कति पय बैंकरहरुले भने मौद्रिक नीति समीक्षामा नीतिगत परिवर्तन गर्नुपर्ने अवस्था नरहेको बताएका छन् । 

जेठ १५ मा बजेट आउने भएकाले तेस्रो त्रैमासमा सामान्य नीतिगत व्यवस्थाबाहेक अरु व्यवस्था परिमार्जन गर्नुपर्ने आवश्यकता थिएन । तेस्रो त्रैमासमा ठूलो नीतिगत परिमार्जनको सम्भावना नहुने भएकाले अत्यावश्यक बाहेक नयाँ विषय नयाँ मौद्रिक नीतिमार्फत आउँदा राम्रो हुने उनीहरुको सुझाव छ । यता, राष्ट्र बैंकले भने समयमा आवश्यक तथ्यांक तोकिएको समयमा नआउने भएकाले त्रैमासिक समीक्षा अवधि १५ दिन बढाउनु परेको हो ।