बाँकेमा गोली हानेर लागु औषध कारोबारी नियन्त्रणमा

२७ वैशाख, बाँके । प्रहरीले बाँकेको कोहलपुरस्थित चप्पलगौँडा भन्ने स्थानमा गोली चलाएर लागु औषध कारोबारीलाई नियन्त्रणमा लिएको छ ।  बिहीबार बिहान काठमाडौँबाट खटिएको लागु औषध नियन्त्रण ब्युरोको टोलीले गोली चलाएर सुशील परियारलाई नियन्त्रणमा लिएको हो । 

ब्यूरोबाट इन्स्पेक्टर रुपेश विष्ट र सई बालकृष्ण सञ्जेलको टीमले सो अपरेसन गरेको जनाइएको छ । ब्यूरोका एक अधिकारीले कारोबारी भाग्न खोजेपछि प्रहरीले गोली चलाएको जानकारी दिए । ती अधिकारीका अनुसार परियारसहित अर्का एक कारोबारी पनि पक्राउ परेका छन् । 

परियारलाई नियन्त्रणमा लिने क्रममा एक राउण्ड गोली चलेको बताइएको छ । कारोबारीको साथबाट ११० ग्राम ब्राउन सुगर बरामद समेत भएको ब्यूरोले जनाएको छ ।