सीआइबीद्वारा बालमन्दिर जग्गा हिनामिना प्रकरणमा २० जनाविरुद्ध पक्राउ पुर्जी जारी

२७ वैशाख, काठमाडौं । नेपाल प्रहरीको केन्द्रीय अनुसन्धान ब्यूरो (सीआइबी) ले काठमाडौंको बालमन्दिरको जग्गा हिनामिना गरेको आरोपमा नेपाल बाल संगठनका तत्कालीन अध्यक्ष रीता सिंह वैद्यसहित २० जनाविरुद्ध पक्राउ पुर्जी जारी गरेको छ । सीआइबीले जिल्ला अदालत काठमाडौबाट पक्राउ पुर्जी लिएर जारी गरेको हो ।

बालमन्दिरको जग्गा हिनामिना भएको देखिएपछि अनुसन्धानका लागि नेपाल बाल संगठनले सीआईबीमा जाहेरी दिएको थियो । अब उनीहरुलाई पक्राउ गरेर कारवाही अगाडी बढाइनेछ । 

सीआईबीका अनुसार जाहेरी दर्तासँगै आरोपितविरुद्ध ठगीको कसुरमा अनुसन्धान सुरु भएको छ । २०४९ देखि साढे २ दशकसम्म बाल संगठनको अध्यक्ष रहँदा वैद्य र उनको कार्यसमितिका पदाधिकारी एवं कर्मचारीको मिलेमतोमा बाल मन्दिरको जग्गा हिनामिना गरिएको देखिएको सीआइबीको भनाइ छ ।