मातातीर्थ औँसीमा नबिल बैंकको सन्देशमूलक भिडियो, आमाको पहिचानका लागि परिवारको दायित्व

२७ वैशाख, काठमाडौं । मातातीर्थ औँसीको अवसरमा नबिल बैंक लिमिटेडले सन्देश मूलक भिडियो बनाएको छ। हरेकको पहिचान बनाउन साथ दिने आमालाई आफ्नो पहिचान बनाएर अघि बढ्न प्रोत्साहन गर्नुपर्छ भन्ने मूल सन्देशका साथ सो भिडियो नबिल बैंकले आफ्नो आधिकारिक सामाजिक सञ्जालहरू मार्फत सार्वजनिक गरेको छ।

विशेषगरी सहर र जागिरमा रहेका महिलाहरू आमा बनेपछिको अवस्थालाई यो भिडियोले औंल्याएको छ। आमा बन्ने क्रममा आफ्नो पहिचान नै बिर्सिएकी आमा, उनको व्यस्तता, बच्चाबच्ची र परिवारप्रतिको उनको दायित्व यो भिडियोमा देखाइएको छ। त्यस्तै, आमालाई आफ्नो पहिचानमा फर्काउन तथा खुसी बनाउन सन्तान र परिवारले खेल्ने भूमिका पनि यो भिडियोमा देखाइएको छ।

जम्मा दुई मिनेट ४५ सेकेन्डको छोटो भिडियोले शहरको सानो परिवार अनि आमाले सन्तानको लालनपालनका आफ्नो करिअरलाई कसरी बिर्सिन्छिन्, भन्ने यथार्थ चित्रण गर्न खोजिएको छ। यस भिडियोले देखाइएको आमाको दैनिकी अधिकांश नेपालीको घरको कथासँग मेल खान्छ।