काभ्रेमा फालमे तारले रुखमा बाँधेर जलाइए एक युवक

२८ वैशाख, काठमाडौं । काभ्रेको पाँचखाल नगरपालिका वडा नम्बर ४ मा रुखमा बाँधेर जलाइएको अवस्थामा एक अन्दाजी २५ वर्षीय युवकको शव फेला परेको छ ।

वडा नं ४ फेदी र जिरोकिलोको बीच भागमा पूर्णरुपमा जलेको अवस्थामा पुरुषको शव फेला परेको प्रहरीले जनाएको छ । तारले रुखमा बाँधेर जलाइएको अवस्थामा शव फेला परेको हो । 

पाँचखाल नगरपालिका– ४ मा अवस्थित फेदी र जिरोकिलो सडकबाट अन्दाजी ५० मिटर जति तल बिराजे खोल्चा जंगलको एकान्त स्थलमा हत्या गरेर जलाएको अवस्थामा युवकको शव फेला परेको हो । जिल्ला प्रहरी कार्यालय काभ्रेका डीएसपी राजकुमार श्रेष्ठले जानकारी दिए । शव सडिसकेको अवस्थामा फेला परेको जनाएको छ ।

श्रेष्ठले गम्भीर प्रकृतिको घटना भएको बताए । शवको पहिचान हुन सकेको छैन । शवको प्रकृति हेर्दा झण्डै २५ वर्ष जति उमेरको पुरुषको भएको अनुमान गरिएको छ । युवकलाई मुख र छात्तीमा फलामको तारले रुखमा बाँधेर आगो लगाएको जस्तो देखिने डीएसपी श्रेष्ठले बताए । ती युवकको २०÷२५ दिनअघि नै हत्या भएको हुनसक्ने अनुमान प्रहरीले गरेको छ ।