सहकारीका ठग बचाउन सरकारले संवैधानिक निकायदेखि प्रहरीसम्म दुरूपयोग गर्योः कांग्रेस

२८ वैशाख, काठमाडौं । नेपाली कांग्रेसले वर्तमान सरकारले सहकारीका बचतकर्ताको रकम ठगेर खुलेआम हिँडिरहेकालाई बचाउन संवैधानिक निकायदेखि प्रहरी प्रशासनसम्म दुरुपयोग गरेको बताएको छ । सहकारीमा नागरिकहरूले बचत गरेको रकम ठगी भएको विषयमा अनुसन्धान गर्न संसदीय छानबिन समिति नबनाएर ठग बचाउन संवैधानिक निकाय र प्रहरी प्रशासन दुरुपयोगमा सरकार लागेको कांग्रेसको ठहर छ । 

नयाँ बानेश्वरस्थित संघीय संसद भवनमा शुक्रबार बिहान बसेको संसदीय दल कार्यसमिति र संसदीय दलको बैठकले सहकारी प्रकरणमा उपप्रधान तथा गृहमन्त्री रवि लामिछानेको संलग्नता देखिएकोले संसदीय छानबिन समिति गठन गर्ने यसअघिकै निर्णय सदर गरेको छ । लामिछानेसमेत मुछिएको सहकारी ठगी प्रकरणमा संसदीय छानबिन समिति गठनको मागलाई कांग्रेसले दह्रो ढंगले उठाउने जनाएको छ । 

अधिवेशन सुरु हुनुपूर्व शुक्रबार दलको बैठकमा सहकारीको रकम अपचलन बारे रुपन्देही प्रहरीको अनुसन्धान प्रतिवेदन सांसदहरूलाई वितरण गर्दै कांग्रेसले माग पूरा गर्न थप दबाब सृजना गर्ने निर्णय गरेको हो । सभापति शेरबहादुर देउवाको निर्देशनमा प्रहरीले तयार पारेको प्रतिवेदन पनि बाँडिएको थियो । उक्त प्रतिवेदनमा लामिछानेको नाम पनि उल्लेख छ । 

रुपन्देही प्रहरी अनुसन्धान प्रतिवेदनका आधारमा नाम उल्लेख भएका माथि सहकारी ऐन र फौजदारी संहिता आकर्षित हुने कांग्रेसको तर्क छ ।  प्रहरी अनुसन्धानका आधारमा रुपन्देही सरकारी वकिलको कार्यालयले अदालतमा दर्ता गरेको अभियोजन पत्रमा गृहमन्त्री लामिछानेले प्रक्रिया पूरा नगरी कर्जा लिएको उल्लेख छ । यो विवरणका आधारमा संसदमा आफ्ना धारण राख्न कांग्रेस सांसदहरूलाई भनिएको छ ।

बैठकपछि प्रमुख सचेतक रमेश लेखकले सहकारीको बचत अपचलन, ठगी र हिनामिना अपराध गर्नेलाई सरकारले जोगाउन खोजेको आरोप लगाए । सहकारीमा नागरिकहरूले गरेको बचत अपचलन, ठगी र हिनामिना अपराध गर्नेलाई जोगाउन सरकारले प्रहरी र संवैधानिक निकाय दुरूपयोग गरेको उनले बताए ।  

गृहमन्त्री रवि लामिछानेले महान्यायाधिवक्ता कार्यालयले आफूमाथि सहकारी प्रकरणमा कहीँ कतै अभियोजन नभएको पत्र दिएको बताएका थिए । यसतर्फ लक्षित गर्दै कांग्रेसले सरकारले संवैधानिक निकाय दुरूपयोग गरेको बताउँदै प्रतिवेदन सांसदलाई बाँडेको हो ।