प्राधिकरणलाई २१ करोड तिरेर टेलिकमले लियो लाइसेन्स

२८ वैशाख, काठमाडौं । नेपाल टेलिकमले २१ करोड तिरेर पाँच वर्षका लागि नयाँ लाइसेन्स लिएको छ ।  नेपाल दूरसञ्चार प्राधिकरणले शुक्रबार टेलिकमलाई जीएसएम सेलुलर मोबाइल सेवाको अनुमतिपत्र दिएको हो । २०५६ सालको वैशाख २९ गते टेलिकमले लाइसेन्स लिएको थियो । त्यसको २५ वर्षे अवधि शुक्रबार सकिएको हो ।

प्राधिकरणका प्रवक्ता सन्तोष पौडेलले टेलिकमलाई लाइसेन्स दिएको जानकारी दिएका छन् । यसअघि बिहीबार बसेको मन्त्रिपरिषद्को बैठकले टेलिकमलाई नयाँ लाइसेन्स दिने गरी निर्देशन दिने निर्णय गरेको थियो । मन्त्रिपरिषद्को बैठकले दूरसञ्चार सेवालाई नियमित गर्ने प्रयोजनको लागि दूरसञ्चार ऐन, २०५३ को दफा २० को अधिकार प्रयोग गरी प्राधिकरणले निर्देशन दिएको थियो ।