प्रधानमन्त्रीको रबैया र सभामुखको भूमिकाप्रति कांग्रेस रुष्ट

२९ वैशाख, काठमाडौं । नेपाली कांग्रेसले प्रधानमन्त्री पुष्पकमल दाहाल प्रचण्ड र सभामुख देवराज घिमिरे संसद बैठक सहज रुपमा चल्न नदिने पक्षमा उभिएको बताएको छ । संसदीय छानबिन समिति नबनाएर संसदलाई प्रभावित बनाउने काम प्रधानमन्त्रीबाट भएको कांग्रेसको भनाइ छ । 

शनिबार पार्टी सभापति शेरबहादुर देउवा निवास बूढानीलकण्ठमा बसेको पदाधिकारीहरूको बैठकले संसदको अवरोध हटाउन सरकार र सभामुख संवेदनशील नबनेको निष्कर्ष निकालेको छ । कांग्रेसले अब संसदमा कसरी प्रस्तुत हुने भन्ने रणनीति  तय गर्न पार्टीको संसदीय दलको बैठक पनि बोलाएको छ । आज बसेको पदाधिकारी बैठकले सभामुख देवराज घिमिरे  र सरकारको रवैया गलत रहेको निष्कर्षसहित सोमबारका लागि दलको बैठक बोलाउने निर्णय गरेको छ ।  
 
आजको बैठकमा अहिले देखिएको गतिरोध अन्त्य र अरू विभिन्न विषयहरूको बारेमा छलफल भएको थियो । शुक्रबार सभामुख देवराज घिमिरे र अरू दलहरूसँग पनि छलफल गरेर गतिरोध पनि अन्त्य गरौँ भन्दा भन्दै सरकारले रवैया देखाइयो त्यो गलत छ । उपप्रधान तथा गृहमन्त्री रवि लामिछानेलाई बोल्न दिने भन्दै गर्दा जसरी कार्यसूचीमा पेस गरियो, यसले सरकार छानबिन समिति बनाउन नदिने भन्नेमा उद्धत रहेको कांग्रेसको आजको निष्कर्ष हो ।  

आगामी संसद बैठकमा कसरी प्रस्तुत हुने भन्ने विषयमा छलफल गर्न वैशाख ३१ गते संसदीय दलको बैठक बोलाएको छ । संसदीय दलको बैठकबाट संसदभित्र आफूलाई कसरी प्रस्तुत हुने भन्नेबारे निर्णय गरेर अघि बढ्ने कांग्रेसले जनाएको छ । गृहमन्त्री रवि लामिछाने सहकारी ठगीमा संलग्न भएकोबारे संसदीय छानबिन समिति नबनाउने तर्फ सरकार अगाडि बढे त्यही अनुसार रणनीति बनाएर अगाडि जाने कांग्रेसको तयारी छ ।