प्रधानमन्त्रीले राजीनामा नदिएसम्म अनसन बस्छुः केसी

२९ वैशाख, काठमाडौं । प्रधानमन्त्रीको राजीनामा माग गर्दै डा. गोविन्द केसीले २२ पटकको अनसन सुरु गरेका छन् । उनले प्रधानमन्त्री पुष्पकमल दाहाल 'प्रचण्ड'ले पदबाट राजीनामा नदिएसम्म आमरण अनसन नतोड्ने बताएका छन् । 

एक विज्ञप्तिमार्फत् शनिबार ४ बजेदेखि अनसन सुरु गरेको जानकारी दिँदै केसीले आफ्नो अन्तिम अल्टिमेटमको अवधिमा पनि मागहरु सम्बोधन नभएको बताएका छन् ।

डा. केसीले जारी गरेको विज्ञप्तिमा भनिएको छ, ‘सशस्त्र द्वन्द्वकालमा मानवता विरोधी, घोर अपराध र युद्ध अपराधमा संलग्न प्रमुख नेताको हैसियतका कारण प्रचण्डको प्रधानमन्त्री पदबाट तुरुन्त राजीनामा दिनुपर्ने तथा निष्पक्ष रुपमा र पीडितहरूले न्याय अनुभूत गर्ने गरी संक्रमणकालीन न्यायको प्रक्रिया टुंगोमा पुग्ने सुनिश्चित गरियोस् ।’

केसीले ३ बुँदे माग राखेर पशुपति क्षेत्रमा अनशन सुरु गरेका हुन् । उनका अन्य मागमा सबै नेपालीले गुणस्तरीय स्वास्थ्य उपचार र निःशुल्क औषधि पाउनुपर्ने र आफूसँग विभिन्न समयमा सरकारले गरेका सहमति कार्यान्वयन गर्नुपर्ने पनि रहेको छ ।