स्कुल बसमा आगजनीः तीन वटा मोटर साइकलमा आए, आगो लगाएर भागे

३० वैशाख, चितवन । तीन वटा मोटरसाइकलमा आएका अज्ञात व्यक्तिले चितवनको भरतपुर महानगरपालिका २० दद्रेनी नजिकै विद्यार्थी लिन गएको बसमा आगजनी गरेर फरार भएका छन् । स्मल हेभन स्कुल कल्याणपुरको बसमा ६ जनाको समूहले आगजनी गरेको हो ।

स्थानीयले दिएको जानकारी अनुसार उनीहरू को थिए भन्ने पत्ता लागेको छैन । बस जलाउने व्यक्तिहरूले बसका सहचालकको मोबाइल लुटेर भाग्ने क्रममा कारवाही गर्छौ भनेका थियौं, गयौँ भन्दै भागेका थिए । बागमती प्रदेश ०६ ००१ क ००४५ नम्बरको बस जलेर पूर्ण रुपमा क्षति भएको छ । ६ जनाको समूहले बसमा पेट्रोल छर्किएर आगो लगाएका थिए । 

उनीहरू सबै फरार छन् । अहिले जिल्ला प्रहरी कार्यालय चितवनले घटनास्थलमा प्रहरी पठाएको जनाएको छ । भागेकाहरूको पहिचान गरी खोजि कार्य सुरु गरिने प्रहरीले जनाएको छ । बसमा भएको आगजनीबाट मानवीय क्षति भने भएको छैन ।