चतराधाम पूर्णमहाकुम्भ मेला अवधिमा ३५ जनाको उद्धार, तीन हजारको उपचार

३० वैशाख, सुनसरी । सुनसरीको बराहक्षेत्र नगरपालिका–१ चतराधाममा गत चैत २७ गतेबाट वैशाख २८ गतेसम्म सञ्चालन भएको पूर्ण महाकुम्भ मेलामा सशस्त्र प्रहरीले ३६ जनाको उद्धारका साथै तीन हजारको स्वास्थ्य उपचार गरेको छ । 

सशस्त्र प्रहरी बल  नेपाल नं १ बराह बाहिनी मुख्यालय पकली सुनसरीको विपद् व्यवस्थापन टिमद्वारा मेला अवधिभर ३६ जनाको उद्धार र स्वास्थ्य शिविरबाट तीन हजार एक सय अठार जना दर्शनार्थीलाई स्वास्थ्य सेवा प्रदान गरिएको हो ।

सशस्त्र प्रहरी निरीक्षकको कमान्डमा राखिएको मोटरबोटसहितको विपद् उद्धार टोलीले स्नान गर्दा खोलाले बगाएर लगेका, खोलामा बेहोस भएका गरी ३६ जनाको उद्धार गरिएको मुख्यालयका नायब महानिरीक्षक अञ्जनी कुमार पोख्ररेलले जानकारी दिए ।  मेलालाई व्यवस्थित र सुरक्षित बनाउन तीन सय जना सुरक्षाकर्मी खटाइएको र प्रहरी नायव उपरीक्षकको कमान्डमा मेलाको अवधिभर स्नान स्थल तथा कार्यक्रम स्थलमा फौज परिचालन गरिएको उनको भनाइ छ ।