संसदीय छानबिन समिति गठनबारे सभामुखले आज पनि सकेनन् सहमति जुटाउन

३० वैशाख, काठमाडौं । सहकारी ठगीका विषयमा छानबिन गर्न समिति बनाउने विषयमा सभामुख देवराज घिमिरेले आज पनि सहमति जुटाउन सकेनन् । प्रमुख राजनीतिक दलका प्रमुख सचेतक, सचेतकहरू बीच आइतबार दिउँसो उनले छलफल गरेका थिए । एमालेले समिति बनाउँदा सरकार जान्छ भन्ने आसयले यसो गर्न नसक्ने बतायो भने कांग्रेस अडान  मै रह्यो ।  

सिंहदरबारस्थित कार्यकक्षमा सभामुखले कानून, न्याय तथा संसदीय मामिला मन्त्री, दलका प्रमुख सचेतक र सचेतकहरूलाई बोलाएका थिए । घिमिरेले नीति तथा कार्यक्रमको तयारी लगायतका विषयमा छलफल चलाए । नीति तथा कार्यक्रम प्रस्तुत गर्न संसद चल्नुपर्ने र संसद चल्न कांग्रेसले उठाएको माग सम्बोधन हुनुपर्ने विषयमा कसरी सहमति गर्ने भन्दै उनले दलहरुसमक्ष प्रश्न गरेका थिए । 

१ जेठमा सरकारको नीति तथा कार्यक्रम आउने भएको छ । सरकारको नीति तथा कार्यक्रम संसदको संयुक्त बैठकमा राष्ट्रपतिले प्रस्तुत गर्ने व्यवस्था छ । तर, प्रमुख प्रतिपक्षी दल नेपाली कांग्रेसले चाहिँ गृहमन्त्री रवि लामिछानेमाथि छानबिन गर्न संसदीय छानबिन समितिको माग गर्दै संसद् अवरुद्ध गर्दै आइरहेको छ ।

आजको बैठकमा पनि कांग्रेस आफ्नो अडानबाट पछाडि हटेन । कांग्रेसका प्रमुख सचेतक रमेश लेखकले संसदीय छानबिन समिति बनाएर संसदको अवरोध हटाउन सरकारले अग्रसरता लिनुपर्ने बताए । उनले भने, ‘छानबिन समिति गठनको निर्णयबाट हामी पछि हटेका छैनौं । समिति गठन नभई अन्य कार्यसूचीमा सदन अगाडि बढ्दैन । ’

कानुन न्याय तथा संसदीय मामिला मन्त्री पदम गिरीले सहकारीका विषयमा संसदीय छानबिन समिति गठन गर्न नसकिने बताए । कांग्रेसले नीति तथा कार्यक्रमलाई अरु कुनै विषयसँग सौदाबाजी गर्न नहुने उनले बताए । नेकपा एमालेका प्रमुख सचेतक महेश बर्तौलाले सहकारीका विषयमा संसदीय छानबिन गठन गर्ने विषय कानुन अनुसार नमिल्ने जिकिर गरे । उनले कांग्रेसले समितिका नाममा सरकार मागेकाले दिन नसकिने बताए ।