जेठ १ गते कांग्रेसले संसद अवरुद्ध गरे राष्ट्रपतिलाई शीतलनिवासबाटै नीति तथा कार्यक्रम वाचन गर्न लगाइने

३० वैशाख, काठमाडौं ।  सरकारी ठगीका विषयमा छानबिन गर्न संसदीय समिति गठनको माग उठाइरहेको नेपाली कांग्रेसले जेठ १ गतेको संसद बैठक अवरुद्ध गरे शीतलनिवासबाटै राष्ट्रपति रामचन्द्र पौडेललाई सरकारको नीति तथा कार्यक्रम वाचन गर्न लगाउने तयारी भएको छ । सत्ता समीकरणमा रहेका मुख्य तीन दल नेकपा एमाले, नेकपा माओवादी र राष्ट्रिय स्वतन्त्र पार्टी (रास्वपा) बीच यस्तो सहमति भएको हो । 

नेकपा एमालेका एक नेताले नेपालबहसलाई दिएको जानकारी अनुसार अध्यक्ष केपी शर्मा ओलीले एमाले सांसदहरूलाई यस्तो जानकारी दिएका हुन् । ओलीले कांग्रेसले जेठ १ गते संसदमा नीति तथा कार्यक्रम सार्वजनिक गर्न नदिए राष्ट्रपति कार्यालयबाटै राष्ट्रपति पौडेललाई प्रस्तुत गर्न लगाउने तयारी भइरहेको बताएका हुन् । राष्ट्रपति कार्यालयबाट नीति तथा कार्यक्रम प्रस्तुत गर्न लगाउने विषयमा अन्य दललाई भने जानकारी छैन । 

प्रधानमन्त्री पुष्पकमल दाहाल प्रचण्डले आइतबार सरकारका नीति तथा कार्यक्रमबारे राष्ट्रपति पौडेलसँग छलफल गरेका थिए । प्रचण्डले छलफलका क्रममा जेठ १ गते कांग्रेसले नीति तथा कार्यक्रम प्रस्तुत हुन दिने भनेको र यदि उसले अवरोध गरेको खण्डमा सरकारले अर्को विकल्प प्रयोग गरेर भएपनि प्रस्तुत गर्ने तयारी गरेको जानकारी गराएको ति नेताले बताए । 

संसद अवरोध खुलाउने बारे प्रधानमन्त्री प्रचण्डले पनि आइतबार बिहान कांग्रेस सभापति शेरबहादुर देउवा लगायतका नेताहरूसँग छलफल गरेका थिए । छलफलमा प्रधानमन्त्रीले सरकारी ठगी प्रकरणमा छानबिन समिति बनाउन आफू सकारात्मक रहेको बताएका थिए । प्रधानमन्त्रीसँगको छलफलपछि कांग्रेसले पनि वातावरण सकारात्मक रहेको बताएको छ । 

यता, यसै विषयमा छलफल गर्न सभामुख देवराज घिमिरेले सिंहदरबारमा राखेको बैठकमा पनि समिति बनाउने विषयमा आज पनि सहमति भएन । एमालेले सरकार समस्यामा पर्ने आंकलन गर्दै समिति गठनमा असहमति जनाउँदै आएको छ । जेठ १ मा संसद बैठक बस्नु अगाडि समिति नबने कांग्रेसले अवरुद्ध गर्ने निश्चित छ । यसैले सत्तारुढ तीन दलले राष्ट्रपति निवासबाटै नीति तथा कार्यक्रम वाचन गर्न लगाउने तयारी गरेका हुन् ।