ललितपुर आगलागीका घाइते महिलाको पनि मृत्यु, मृतकको संख्या ३ पुग्यो

 ३१ वैशाख, काठमाडौं । ललितपुर महानगरपालिका–१७ स्थित बाफलको आगलागीमा घाइते भएका थप एक जनाको मृत्यु भएको छ । किष्ट अस्पताल नजिकैको टहरामा आगलागीमा परेर गम्भीर घाइते भएकी रुपा गिरीको गएराति किष्ट अस्पतालमा मृत्यु भएको जिल्ला प्रहरी परिसर ललितपुरका एसपी नरेश सुवेदीले जानकारी दिए । योसँगै आगलागीमा परी ज्यान जानेको संख्या तीन पुगेको छ । 

मोबिल स्टोर गरिएको टहरोमा गत वैशाख २३ गते आगलागी हुँदा सञ्जय गिरी परिवारका पाँच सदस्य घाइते भएका थिए । भोलिपल्ट सञ्जयका छोरीहरू ८ वर्षीया प्रिया र ३ वर्षीया एलिशा गिरीको मृत्यु भएको थियो । सञ्जयकी श्रीमती ३२ वर्षीया रुपा गिरीको पनि उपचारको क्रममा गएराति मृत्यु भएको हो।

आगलागीमा परी घाइते भएका सञ्जयको भेन्टिलेटरमा राखेर उपचार भइरहेको छ । उनीहरुका भतिज १५ वर्षीय नित गिरीको पनि उपचार जारी छ ।