प्रधानमन्त्रीको निर्णय कुर्दै कांग्रेसले स्थगित गर्यो संसदीय दलको बैठक

३१ वैशाख, काठमाडौं । सहकारी ठगी प्रकरणको छानबिनका लागि संसदीय समिति बनाउनुपर्ने माग राख्दै आएको नेपाली कांग्रेसले प्रधानमन्त्री पुष्पकमल दाहाल प्रचण्डको निर्णय कुर्दै संसदीय दलको बैठक भोलि मंगलबार बिहानका लागि सारेको छ । कांग्रेसले दलकाे कार्यसमिति बैठक सोमबार दिउँसो १ बजे र संसदीय दल बैठक २ बजेका लागि बोलाइएको थियो ।

आइतबार प्रधानमन्त्री प्रचण्डले समिति गठन गर्न सकिने आश्वासन दिएर मंगलबार बिहानसम्म पर्खन कांग्रेसलाई आग्रह गरेका थिए । प्रधानमन्त्री समिति बनाउन सकारात्मक भएको र त्यसअघि दलको बैठक बसेर अगामी रणनीतिबारे निर्णय गर्दा हतार हुने भन्दै कांग्रेसले आजको बैठक स्थगित गरेको जनाएको छ । 

सरकारका तर्फबाट प्रधानमन्त्रीले के जवाफ दिनुहुन्छ, त्यसपछि मात्रै निर्णय गर्ने गरी कांग्रेसको बैठक सारिएको एक नेताले बताए । संसदीय दल कार्यसमिति बैठक मंगलबार बिहान ८ बजे र संसदीय दल बैठक ९ बजे बस्ने तय भएको संसदीय दलले निकालेको सूचनामा उल्लेख छ । 

सरकारले मंगलबार संघीय संसदको संयुक्त बैठकमा नीति तथा कार्यक्रम ल्याउने तयारी गरेको छ । राष्ट्रपति रामचन्द्र पौडेलले नीति तथा कार्यक्रम प्रस्तुत गर्ने कार्यक्रम छ । कांग्रेसले सहकारी प्रकरणमा उपप्रधान तथा गृहमन्त्री रवि लामिछाने जोडिएको भन्दै संसदीय छानबिन समिति बनाउनुपर्ने अडान राखेको छ । 

प्रधानमन्त्री प्रचण्डले पनि मंगलबार बिहानसम्म संसदको गतिरोध अन्त्य गर्ने बताइरहेका छन् । संकटग्रस्त सहकारीबारे अध्ययन गरी प्रतिवेदन दिने गरी समिति बनाउन सकिने प्रधानमन्त्रीको भनाइ छ । समिति बनाउन सत्तापक्षमा सहमति नभए कांग्रेसले संसदमा नीति तथा कार्यक्रम प्रस्तुत गर्न दिने छैन । यो अवस्था आएर राष्ट्रपति कार्यालयबाटै नीति तथा सार्वजनिक गर्ने अर्को तयारी पनि सरकारले गरिरहेको छ ।