उदघाटन गरेको ९ दिन नपुग्दै हावाले भत्कायो इलाका प्रहरी कार्यालय जयनगरको पर्खाल

•दीपक शर्मा

३१ वैशाख बर्दिया । इलाका प्रहरी कार्यालय जयनगर बर्दियाको पर्खाल भत्किएको छ । सामान्य हावाहुरीको बहाव थेग्न नसकेर पर्खाल भत्किएको हो । बारबर्दिया नगरपालिका जयनगरमा नौ  दिन अघि मात्र भवनको उद्घाटन लुम्बिनी प्रदेश प्रहरी कार्यालयका प्रमुख डीआईजी कुबेर कडायतले  गरेका थिए ।  करिब ३ करोड रुपैयाँको लागतमा निर्माण भएको भवन र पर्खाल सामान्य हावाहुरीले पर्खाल भत्किँदा कामको गुणस्तर माथि प्रश्न चिन्ह खडा भएको छ ।

लुम्बिनी प्रदेश सरकारको नियमित बजेट अन्तर्गत निर्माण गरिएको उक्त भवन एम पी कन्स्ट्रक्सन बाँकेले निर्माण गरेको थियो । काम गर्दा केही कमजोरी भएकै कारण  पर्खाल  भत्किएको जिल्ला प्रहरी कार्यालय बर्दियाका प्रहरी उपरीक्षक प्रवीण धितालले बताए । निर्माण कम्पनीले पर्खाल पुन निर्माण गर्ने उनको भनाई थियो ।

काम गर्दा निर्माण कम्पनीले गुणस्तरहीन काम गरेका कारण पर्खाल सामान्य हावाहुरीमै भत्किएको स्थानीयबासीहरुकाे भनाई रहेको छ । प्रहरीको कार्यालय त्यो पनि निर्माण सम्पन्न भएको नौ दिनमा नै पर्खाल भत्किएपछि भवनको निर्माण माथि पनि प्रश्न चिन्ह खडा भएको छ ।