कांग्रेसले मंगलबार बिहानसम्म प्रधानमन्त्रीको निर्णय कुर्ने

३१ वैशाख, काठमाडौं । नेपाली कांग्रेसले मंगलबार बिहानसम्म सरकारका तर्फबाट प्रधानमन्त्री पुष्पकमल दाहाल प्रचण्डले दिने निर्णय कुर्ने भएको छ । आइतबार संसदीय समिति गठन गर्ने आश्वासन प्रधानमन्त्री प्रचण्डले दिएको भन्दै कांग्रेसले भोलि बिहानसम्म कुर्ने निर्णय गरेको हो । 

सोमबार बिहान सभापति शेरबहादुर देउवाको निवास बुढानिलकण्ठमा बसेको शीर्ष नेताहरूको बैठकले प्रधानमन्त्री प्रचण्डले छानबिन समिति बनाउने भनेकाले साँझसम्म प्रधानमन्त्रीले केही निर्णय दिने र नदिए भोलि बिहान बस्ने संसदीय दलको बैठकबाट थप निर्णय लिने भन्दै बैठक सकिएको एक नेताले नेपालबहसलाई जानकारी दिए । 

उनले भने, ‘छानबिन समिति बनाउन प्रधानमन्त्रीलाई खासै आपत्ति छैन । एमालेको पोजिसन छानबिन समिति बन्नै नदिने छ । तर, पनि प्रधानमन्त्री भने अनुसार हामीलाई विश्वास भएर नै आजको संसदीय दलको बैठक सारिएको हो ।’ यसपछि सोमबार दिउँसो २ बजे बस्ने गरी बोलाइएको संसदीय दलको बैठक मंगलबार बिहानका लागि सारिएको छ । 

बैठकमा सोमबार साँझसम्म छानविन समिति बनाउने गरी प्रधानमन्त्रीले पहल लिने अपेक्षा सहितको छलफल भएको थियो । ‘प्रधानमन्त्रीले आज साँझसम्म कांग्रेसलाई बोलाएर छानविन समितिका बारेमा समझदारी गराउने जानकारी दिएका छन् । कांग्रेस बैठकमा सत्तारुढ दलमा एमाले बाहेक अन्य दल छानबिन समितिको चर्को विरोधी नरहेको विषय उठेको थियो । संसदीय छानबिन समितिको पूर्व अडानबाट पछि नहट्ने कांग्रेसको निर्णय भने कायमै रहेको छ ।