निर्वाचन आयोगविरुद्ध उपेन्द्र यादवले दर्ता गराए सर्वोच्चमा रिट, जेठ २ गते पेसी

३१ वैशाख, काठमाडौं । जनता समाजवादी पार्टी नेपालले निर्वाचन आयोगविरुद्ध सर्वोच्च अदालतमा रिट निवेदन दिएको छ । अध्यक्ष उपेन्द्र यादवले आयोगविरुद्ध सर्वोच्चमा रिट दायर गरेका हुन् । निर्वाचन आयोगले दल दर्ताको नीति विपरित कानुनका न्युनतम सर्तसमेत पूरा नगरी राजनीतिक आग्रहका आधारमा दल विभाजित गरिदिएको यादवको दाबी छ । 

सर्वोच्च अदालतले यादवको रिटलाई आगामी जेठ २ गते पेसी तोकेको छ । उपेन्द्र यादव स्वास्थ्यमन्त्रीको हैसियतमा अमेरिका भ्रमणमा रहेका बेला नेता अशोक राईले आफ्नो नेतृत्वमा सात सांसद लिएर निर्वाचन आयोगमा दल दर्ताका लागि निवेदन दिएका थिए ।
 
निवेदन दिएको भोलिपल्ट नै आयोगले राई नेतृत्वको समूहलाई जसपा नामसहित दलीय मान्यता प्रदान गरेको थियो । आयोगले अर्को दिन दल दर्ताको प्रमाणपत्र दिएको थियो । राजनीतिक दलसम्बन्धी नियमावलीका आधारमा नयाँ दललाई मान्यता दिएको निर्वाचन आयोगले जनाएको छ । ऐन नै नभएका बेला नियमावली देखाएर दल विभाजन गर्न नपाइने भन्दै आएका यादवले त्यसविरुद्ध सोमबार सर्वाेच्चमा रिट दायर गरेका हुन् ।