मन्त्रिमण्डल पुनर्गठन गर्दै प्रधानमन्त्री, जसपाले पठायो तीन जनाको नाम

३१ वैशाख, काठमाडौं । प्रधानमन्त्री पुष्पकमल दाहाल प्रचण्डले मन्त्रिमण्डल पुनर्गठन गर्ने भएका छन् । सोमबार बिहान उपप्रधान एवं स्वास्थ्यमन्त्री उपेन्द्र यादवले राजीनामा दिएपछि उनले मन्त्रिमण्डल पुनर्गठन गर्न लागेका हुन् । प्रधानमन्त्री प्रचण्डले अशोक राई नेतृत्वको जनता समाजवादी पार्टीसँग मन्त्री बन्नेको नाम मागेपछि उसले तीन जनाको नाम पठाएको छ । 

जसपाले सांसदहरू प्रदीप यादव, रञ्जु झा र हसिना खानलाई सरकारमा पठाएको हो । प्रधानमन्त्रीले  यादवलाई स्वास्थ्य तथा जनसंख्या मन्त्री र खान स्वास्थ्य राज्यमन्त्रीको जिम्मेवारी दिने तयारी गरेका छन् । झाको मन्त्रालयका विषयमा छलफल हुँदैछ ।  

जनता समाजवादी पार्टी नेपालबाट उपप्रधान तथा स्वास्थ्यमन्त्री बनेका उपेन्द्र यादव र वन राज्यमन्त्री दीपक कार्कीले आजै राजीनामा दिएका छन् । जसपा नेपाल सरकारबाट बाहिरिएपछि जसपाको मन्त्री थपिन लागेका हुन् । मन्त्रिमण्डल पुनर्गठनको समय भने दिइएको छैन् ।