कांग्रेसको माग सम्बोधन हुने गरी आजको छलफललाई टुंगोमा पुर्याउने प्रयासमा प्रधानमन्त्री

३१ वैशाख, काठमाडौं ।  प्रधानमन्त्री पुष्पकमल दाहाल प्रचण्डले सत्ता पक्षका नेतालाई छलफलमा बोलाएका छन् । नेपाली कांग्रेसले संसदीय छानबिन समितिको माग राखेर गरिरहेको संसद अवरोध खुलाउन प्रधानमन्त्रीले सत्तापक्षका नेतालाई बोलाएका हुन् । सत्ता पक्षको छलफलपछि कांग्रेससँग छलफल गर्ने प्रधानमन्त्रीको तयारी छ । 

सोमबार पूर्वी चितवन पुगेका प्रधानमन्त्री प्रचण्डले राजनीतिक दलहरूबीच अनौपचारिक एवं औपचारिक रूपमा छलफल भइरहेको र आज त्यो विषयलाई जसरी पनि निष्कर्षमा पुर्याउनुपर्ने बताएका थिए । आइतबार कांग्रेससँग छलफल गरेपछि प्रधानमन्त्रीले समिति गठन गर्ने कुरा सार्वजनिक रुपमै बताइरहेका छन् । सदनको गतिरोध अन्त्य भइसकेको छैन, आज यसबारे हामी टुंगोमा पुग्नु पर्नेछ । त्यसैले दलहरूबीच सघन छलफल हुन्छ भन्दै प्रधानमन्त्रीले चितवनबाट काठमाडौं फर्कन हतार गरेका थिए । 

नेपाली कांग्रेसले संसदीय छानबिन समिति गठनको माग गर्दै संसद् अवरोध गर्दै आइरहेको छ । भोलि, मंगलबार संसदको संयुक्त बैठकमा राष्ट्रपतिले सरकारको नीति तथा कार्यक्रम प्रस्तुत गर्ने कार्यक्रम छ । यसलाई मध्यनजर गर्दै प्रधानमन्त्रीले आज जसरी पनि सहमति निकाल्ने बताएका छन् । प्रधानमन्त्रीको सचिवालयले सत्तापक्षको बैठक बस्ने तयारी भइरहेको जानकार दिएको छ ।  

बैठकमा विशेषगरी प्रमुख प्रतिपक्ष दलले माग गरेको संसदीय छानबिन समिति गठनको विषयमा छलफल हुने सचिवालयले जनाएको छ । सहकारीको बचत अपचलन र ठगी प्रकरणमा गृहमन्त्री समेत रहेका रास्वपा सभापति रवि लामिछानेको संलग्नता रहेको भन्दै संसदीय छानबिन समितिको माग भएको हो । पोखरा, बुटवल लगायतबाट प्राप्त प्रतिवेदनहरूले समितिको औचित्य र आवश्यकता पुष्टि भएको भन्दै कांग्रेसले जुनसुकै हालतमा समिति बनाउनुपर्ने माग गरिरहेको छ । उसले सदन बैठक चल्न दिएको छैन ।