सतर्कताले अख्तियारलाई बुझायो प्रतिवेदन, सम्पति विवरण नबुझाउनेको संख्या ६ हजार ७०५

३१ वैशाख, काठमाडौं । राष्ट्रिय सतर्कता केन्द्रले आर्थिक वर्ष २०७९/८० मा सम्पत्ति विवरण बुझाउने पदाधिकारी र कर्मचारीको संख्यासम्बन्धी प्रतिवेदन अख्तियार दुरुपयोग अनुसन्धान आयोगलाई बुझाएको छ । जसमा ६ हजार ७०५ जनाले सम्पति विवरण नबुझाएको पाइएको छ । यस मध्ये ३ हजार ३८६ जना निजामती कर्मचारी छन् । 

सतर्कताले विगतका वर्षभन्दा सम्पत्ति विवरण बुझाउनेको संख्या बढेको जनाएको छ । निर्धारित समय भित्रै सम्पत्ति विवरण बुझाउने पदाधिकारी र कर्मचारीको संख्या आर्थिक वर्ष २०७८/७९ मा ७ लाख १९ हजार १५७ जना थियो भने आर्थिक वर्ष २०७९/८० मा ७ लाख ३९  हजार ७५८ जना पुगेका छन् । 
 
आर्थिक वर्ष २०७८/७९ को सम्पत्ति विवरण नबुझाउनेको संख्या ९ हजार ५९० जना थियो भने आर्थिक वर्ष २०७९/८० को सम्पत्ति विवरण नबुझाउनेको संख्या ६ हजार ७०५ जनामा झरेको छ । प्रतिवेदन तयार गर्ने क्रममा संघ, प्रादेशिक र स्थानीय तहहरूसँग समन्वय गरिएको थियो । सम्पत्ति विवरण नबुझाउनेमा विद्यालय शिक्षक ८३१, अन्य राजनीतिक नियुक्ति तथा करारतर्फ ८८९ जना रहेका छन् ।