नीति तथा कार्यक्रमलाई अवरोध नगर्न कांग्रेसलाई प्रधानमन्त्रीको आग्रह

१ जेठ, काठमाडौं । प्रधानमन्त्री पुष्पकमल दाहाल प्रचण्डले आज संसदमा प्रस्तुत हुने आगामी आर्थिक वर्षको नीति तथा कार्यक्रममा अवरोध नगरीदिन नेपाली कांग्रेसका नेताहरूसँग आग्रह गरेका छन् । 

आज बिहान बालुवाटारमा कांग्रेस नेता रमेश लेखक र गगन थापासँग भएको छलफलमा प्रधानमन्त्रीले आज राष्ट्रपति रामचन्द्र पौडेलको सम्बोधनमा सहयोग गर्न आग्रह गरेका हुन् ।  

बैठक पछि कांग्रेस मुख्य सचेतक लेखकले समस्या समाधानका लागि कोसिस गरिरहेकाले राष्ट्रपतिले सम्बोधन गर्ने कार्यक्रममा अवरोध नगरीदिन प्रधानमन्त्रीले आग्रह गरेको बताए ।

प्रधानमन्त्री दाहालले कांग्रेसले उठाइरहेको माग सम्बोधनको विषय रहेकाले समस्याको समाधान गर्ने प्रतिबद्धता जाहेर गरेको उनको भनाइ छ ।

उनले भने, ‘प्रधानमन्त्रीले पहिलो कुरा राष्ट्रपतिको सम्बोधनलाई अवरोध नगरीदिन आग्रह गर्नुभयो भने अर्को कुरा सहकारी प्रकरणको समस्या समाधान गर्ने प्रतिबद्धता जनाउनु भयो । हामी यो

व्यवहारमा देख्न चाहन्छौं ।’ 

प्रधानमन्त्रीले सहकारी ठगी प्रकरणमा समस्या समाधानका लागि पहल गरिरहेका आश्वासन दिएपछि  कांग्रेस अवरुद्ध सदन खुलाउन सकारात्मक भएकाे  लेखकले बताए ।

लेखकले संसद अवरुद्ध खुलाउने विषयमा संसदीय दलको बैठकपछि निष्कर्षमा पुग्ने बताए । कांग्रेस संसदीय दलको बैठक केहीबेरमै बस्दैछ ।