सभामुखले बोलाए दलका सचेतक र कार्यव्यवस्था परामर्श समितिको बैठक

१ जेठ, काठमाडौं । प्रतिनिधि सभाका सभामुख देवराज घिमिरेले सरकारका नीति तथा कार्यक्रम सार्वजनिक हुनुभन्दा अगाडी दलका सचेतक र प्रमुख सचेतकको बैठक बोलाएका छन् । साढे १२ बजे दलका सचेतक र प्रमुख सचेतकसँग छलफल सकेर १ बजे कार्यव्यवस्था परामर्श समितिको बैठक बस्नेछ । 

राष्ट्रपति रामचन्द्र पौडेलबाट संघीय संसद्का दुवै सदनको संयुक्त बैठकमा आज आउँदो आर्थिक वर्षको सरकारको नीति तथा कार्यक्रम प्रस्तुत गरिने कार्यसूची छ । दिउँसो ३ बजे प्रस्तुत गरिने उक्त कार्यक्रमको तयारीमा संसद् सचिवालय युद्धस्तरमा जुटेको छ ।

संसद् सचिवालयले सुरक्षा प्रबन्धलगायत साजसज्जाको तयारी पूरा गरेको जनाएको छ । सरकारको वार्षिक बजेटअघि संघीय संसद्का दुवै सदनमा नीति तथा कार्यक्रम प्रस्तुत गर्ने परम्परा छ । मन्त्रिपरिषद्को सिफारिसमा नेपालको संविधानको धारा ९५ बमोजिम दुवै सदनको संयुक्त बैठकमा नीति तथा कार्यक्रम प्रस्तुत गर्ने कार्यसूची पनि संसद् सचिवालयले सार्वजनिक गरिसकेको छ ।