आज राष्ट्रपतिलाई रोक्ने कि नरोक्न भन्नेबारे कांग्रेसमा छलफल सुरु

१ जेठ, काठमाडौं । नेपाली कांग्रेस संसदीय दलको बैठक सुरु भएको छ । संसदीय दलको कार्यालय सिंहदरबारमा केहीबेर अघि बैठक सुरु भएको हो । आजको कांग्रेसको छलफल सरकारका नीति तथा कार्यक्रम प्रस्तुत गर्न दिने कि नदिने भन्नेमा केन्द्रित रहनेछ । राष्ट्रपतिले नीति तथा कार्यक्रम प्रस्तुत गरेपछि अवरोध गर्नुपर्ने मत कांग्रेसमा पनि देखिएको छ । 

राष्ट्रपति देशको सर्वोच्च निकाय भएको र संवैधानिक संस्थाका रुपमा रहेका राष्ट्रपतिलाई रोक्दा सन्देश गलत जाने विषय पनि उठेको छ । एकथरी नेताले राष्ट्रपतिले प्रस्तुत गर्ने नीति तथा कार्यक्रम पनि सरकारकै कार्यक्रम भएकाले रोक्नुपर्ने बताएका छन् । दलको बैठकले यसबारे निर्णय गर्नेछ । 

प्रधानमन्त्रीले संसदीय समिति बनाउने बारे कही निष्कर्ष दिने भनेपछि सोमबार दिउँसो तय भएको बैठक स्थगित भएको थियो । संसदमा सिर्जना भएको घटनाक्रमबारे थप छलफल गर्नका लागि बैठक बोलाइएको कांग्रेसले जनाएको छ । कांग्रेसले सहकारी ठगीमा गृहमन्त्री रवि लामिछानेको संलग्नताबारे संसदीय छानबिन समिति गठन गर्नुपर्ने माग गर्दै आएको छ ।