राष्ट्रपति आउनुअघि संसद परिसरमा गरियो कसरी सवारी गराउने भन्ने अभ्यास

१ जेठ, काठमाडौं । सरकारको नीति तथा कार्यक्रम प्रस्तुत हुने संघीय संसद भवनलाई सिंगारिएको छ । राष्ट्रपति रामचन्द्र पौडेलले आज तीन बजे बस्ने संघीय संसदको बैठकमा नीति तथा कार्यक्रम प्रस्तुत गर्नेछन् । 

राष्ट्रपति रामचन्द्र पौडेलले संसदमा नीति तथा कार्यक्रम पेस गर्न आउनुअघि उनलाई कसरी स्वागत गर्ने र भित्र पुर्याउने तथा निस्कँदा के गर्ने भन्ने अभ्यास गरिएको छ । सभामुख देवराज घिमिरे, राष्ट्रिय सभा अध्यक्ष नारायण दाहाललगायतका पदाधिकारी तथा कर्मचारीको उपस्थितिमा अभ्यास गरिएको हो । 

संसद भवन भित्र र बाहिर सुरक्षा व्यवस्था चुस्त बनाइएको छ । सुरक्षाकर्मीहरुसँगै तालिमप्राप्त कुकुरसमेत परिचालन गरिएको छ । संघीय संसद भवनलाई राष्ट्रिय झण्डा, तोरन र फूलले सजाइएको छ । पानीको फोहोरा फ्यांक्ने फाउन्टेन पनि चलाइएको छ ।